بھٹکل 9/مئی (ایس او نیوز) بھٹکل کی تاریخ میں غالباً پہلی بار کسی اُمیدوار نے  میونسپل انتخابات کے لئے  اپنا انتخابی منشور جاری کیا ہے اور ووٹروں سے  اپنے حق میں ووٹ دینے کی اپیل کی ہے۔ بھٹکل عثمان نگر سکینڈ کراس کے مکین   اور کولا ٹراویلس کے مالک ابراہیم رویفع   کولا نے اس بار میونسپل انتخابات میں حصہ لینے کا فیصلہ کرتے ہوئے سوشیل میڈیا پر اپنا انتخابی منشور جاری کیا ہے اور  اپنے ووٹروں سے  وعدہ کیاہے کہ وہ  عوام کے مسائل حل کرنے کی پوری کوشش کریں گے۔

بھٹکل میں 29 مئی کو میونسپل انتخابات ہونے جارہے ہیں جس کے لئے  پرچہ نامزدگی داخل کرنے کی آخری تاریخ 16 مئی ہے، لیکن چونکہ بھٹکل کی جملہ 23 وارڈوں  میں سے قریب 17/18 وارڈوں میں تنظیم کے حمایت یافتہ اُمیدوار بلامقابلہ منتخب ہوتے ہیں،  اس لئے ابھی سے  کئی اُمیدوار تنظیم کی حمایت حاصل کرنے   تنظیم میں درخواست فارم  کو  جمع کرادیا ہے۔ فارم جمع کرنے والوں میں  رویفع  کولا بھی شامل ہیں جنہوں نے وارڈ  نمبر 12 سے میونسپل انتخابات میں کھڑے ہونے کا فیصلہ کیا ہے۔ ان کے وارڈ میں  طور مسجد کا علاقہ،  اسپتال روڈ، کوٹیشور روڈ،  عثمان نگر فرسٹ اینڈ سکینڈکراس کے ساتھ ساتھ نور مسجد اور صدیقی مسجد  کا بھی کچھ حصہ لگتا ہے۔

بی کام گریجویٹ  رویفع  کولا بھٹکل لبیک نوائط اسپورٹس اسوسی ایشن کے سرگرم رکن ہیں، انہوں نے اپنے  ووٹروں کو آٹھ وعدوں کے ساتھ الیکشن مینو فیسٹو جاری کیا ہے جس میں  اہم گھر کا ٹیکس گھر پر ہی پہنچ کر حاصل کرنے کی سہولت دینے کا وعدہ ہے جس کے ذریعے وارڈ کے لوگوں کو  ٹیکس بھرنے کے لئے میونسپالٹی کے چکر کاٹنے کی ضرورت نہیں پڑے گی۔ اسی طرح  مچھروں  پر قابو پانے  کے لئے اپنے وارڈ میں  ہر پندرہ دن میں فوگنگ  ، سرکاری ہیلتھ کارڈ میں مکمل تعاون اور دیگر  میونسپالٹی سے جُڑے کاموں کا انجام دینے کا  وعدہ شامل ہے۔

فی الحال ان کا درخواست نامہ  تنظیم کے ٹیبل پر ہے اور رویفع اس  وقت اپنے وارڈ کے مختلف علاقوں کے ذمہ داروں سے  رابطہ کرتے ہوئے اپنے حق میں  رائے عامہ بنانے میں مصروف ہیں۔ اب یہ دیکھنا دلچسپ ہوگا کہ قومی سماجی ادارہ مجلس اصلاح و تنظیم کی طرف سے  وارڈ نمبر 12 کے لئے  رویفع کولا کے حق میں منظوری ملتی ہے یا نہیں۔