بھٹکل :12؍ اپریل(ایس اؤ نیوز) بھٹکل خلیفہ محلہ کے  کوسموس اسپورٹس سنٹر کی عمارت کی تجدید نو کا 11مئی 2021بروز اتوار بعدنماز عصر مرکزی خلیفہ جماعت المسلمین بھٹکل کے قاضی مولانا خواجہ معین الدین اکرمی مدنی کے ہاتھوں افتتاح عمل میں آیا۔

اس موقع پر مولانا نے خطاب کرتے ہوئے بھٹکل مسلم یوتھفیڈریشن کو شہر بھٹکل کے نوجوانوں کا ایک اہم ذمہ دار ادارہ قرار دیا اور کہا کہ  ہر اسپورٹس سنٹر کی ذمہ داری بنتی ہے کہ وہ فیڈریشن کو ہرلمحہ ساتھ دیتے ہوئے اس کو مزید قوت بخشے۔ فیڈریشن کے ذریعے بھٹکل کے بہت سارے کام انجام دئیے جاتےہیں۔ کسی بھی ادارے کی ترقی اس کے ممبران کے بہترین صلاح ومشورے پر منحصر ہے۔ ادارے کا ذمہ دار کوئی بھی ہو، ممبران کے لئے ضروری ہے کہ وہ تعاون کریں اور بہترین رائے مشوروں سے نوازیں۔ 

تقریب کا آغاز تلاوت قرآن سے ہوا۔کوسموس سنٹر کے جنرل سکریٹری مولوی انجم گنگاولی ندوی نے استقبال کیا۔ کوسموس سنٹر کے صدر مولوی ارشاد نائطے ندوی نے شکریہ اداکیا، اسماعیل چڈوباپا نے نظامت کی۔پروگرام میں  مرکزی خلیفہ جماعت المسلمین بھٹکل کے صدر میراں صدیق،جماعت المسلمین بھٹکل کے صدر جان عبدالرحمن محتشم، انجمن حامئی مسلمین بھٹکل کے جنرل سکریٹری صدیق اسماعیل ، جامعہ اسلامیہ بھٹکل کے صدر مولانا عبدالعلیم قاسمی ،بھٹکل مسلم یوتھ فیڈریشن کے صدر مولوی عزیز الرحمن رکن الدین ندوی ،   میونسپالٹی صدر پرویز قاسمجی وغیرہ موجود تھے۔