کاروار 26/ مارچ (ایس ا و نیوز) ضلع شمالی کینرا میں کوروناوائرس کی وباء اور اس پر قابو پانے کے لئے ضلع انتظامیہ کی طرف سے جو پابندیاں عائد کی گئی ہیں، اس کی خلاف ورزی کرنے والوں پر سخت ترین قانونی اقدامات کرنے کی وارننگ ضلع ڈپٹی کمشنر ڈاکٹر ہریش کمار نے دی ہے۔

 آج جاری کیے گئے بیان میں ڈی سی نے کہا ہے کہ:”ہم شہریوں کو ان کے گھروں کے دروازے تک روزانہ کی اشیائے ضروریہ پہنچانے کا انتظام کرنے اور اٰسے بحسن وخوبی انجام دینے کے لئے پوری سرگرمی سے منصوبہ بندی کررہے ہیں۔ ایک دن کے اندر تقریباً تمام مسائل کو حل کرلیا جائے گا۔“

انہوں نے کہا:”اس دوران ہم یہ  دیکھ رہے ہیں کہ شہریوں کے بعض طبقات حالات کی سنگینی کو سمجھ نہیں پارہے ہیں اورضلع انتظامیہ کی طرف سے عائد پابندیوں کی خلاف ورزی کرتے ہوئے بلاوجہ پریشانیاں اور مسائل کھڑے کررہے ہیں۔“

 ڈپٹی کمشنر کا کہنا ہے:”میں اس بات پر پوری طرح مطمئن ہوں کہ ایسے لوگوں کے خلاف سخت قانونی کارروائیاں کرتے ہوئے ان سے نپٹنے کا یہی بالکل صحیح وقت ہے۔ مگر اُس سے قبل صحت عامہ کے مفاد کے پیش نظریہی زیادہ بہتر اور مؤثر ہوگا کہ ایسی خلاف ورزیاں کرنے والوں پر سماجی دباؤ بنانے کے لئے ان کی شناخت عوام کے سامنے ظاہر کی جائے۔“    

 بیان کے مطابق کل سے ضلع انتظامیہ کی طرف سے لاگو کی گئی پابندیوں کی خلاف ورزی کرنے والوں پر مندرجہ ذیل کارروائی کی جائے گی۔

۱۔    پہلی مرتبہ خلاف ورزی کرنے والے کی کلائی پر نہ مٹنے والی سیاہی سے نشان لگائے جائیں گے۔
۲۔    دوسری مرتبہ قانون کی خلاف ورزی کرنے کی صورت میں اس مرد /خاتون کے نام کا اعلان ان کی رہائش والے علاقے میں پبلک   اناؤنسمنٹ سسٹم (مائک) سے کیا جائے گا۔ 
۳،    تیسری مرتبہ خلاف وزری کرنے والوں کی تصاویر ضلع انتظامیہ کے ویب سائٹ پر شائع کرنے کے علاوہ عوامی مقامات پر چسپاں کی جائیں گی۔

ڈپٹی کمشنر نے اپنے اس بیان میں امید ظاہر کی ہے کہ ضلع شمالی کینرا کے ذمہ دار شہری ہونے کا ثبوت دیتے ہوئے عوام اس وقت لاگو کیے گئے قوانین کی پوری طرح پابندی کریں گے اور ضلع انتظامیہ کو اس طرح کے انتہائی سخت اقدامات کرنے کا کوئی موقع نہیں دیں گے۔

واضح رہے  کہ ضلع اُترکنڑا کے کئی علاقوں میں لاک ڈاون کے باوجود عوام غیرذمہ داری کا مظاہرہ کرتے ہوئے راستوں پر  آوارہ گردی کرنے کی اطلاعات ملی ہیں،گھروں سے باہر نہ نکلنے کی بار بار تاکید کے باوجود  کئی علاقوں  کی گلیوں میں بھی نوجوانوں کو   آوارہ گردی کرتے ہوئے  دیکھا  گیا ہے ۔ اس کے علاوہ بھٹکل میں دبئی سے لوٹنے والے   دو لوگوں کی  رپورٹ کورونا پوزیٹیو آنے کے بعد میڈیکل ٹیموں کو گھر گھر روانہ کرکے جانکاری حاصل کرنے کا کام بھی شروع کیا گیا  ہے،تاکہ بھٹکل سے کورونا کا صفایہ کیا جاسکے،   مگر اطلاع ملی ہے کہ کئی علاقوں میں  میڈیکل ٹیموں کو معلومات نہیں دی گئی  ہے اور اُنہیں واپس بھیجا گیا  ہے۔