بھٹکل میں 73ویں یوم ِ آزادی کا جشن : ہرمیدان میں ملک کی ترقی اعلیٰ اور مثالی : اے سی ساجد ملا
بھٹکل:15؍اگست (ایس اؤ نیوز)ملک کی جنگ آزادی میں ہرایک دھرم، ذات، طبقہ ، نسل کے لوگ متحد ہوکر عدم تشدد کا راستہ اختیار کرتےہوئے ہر کسی نے جدوجہد کی ہے اور اس آزادی کے لئے بےشمار لوگوں نے اپنی جانوں کی قربانی دی ہے۔ ایسے مثالی لوگوں کو آج کے دن یاد کرنا ہمارا اہم فریضہ ہے۔ بھٹکل اسسٹنٹ کمشنر ساجد ملا نے ان خیالات کا اظہار کیا۔
وہ یہاں تعلقہ میدان میں 73ویں یوم ِ آزادی کے موقع پر منعقدہ پروگرام میں پرچم لہرانے کے بعد عوام سے خطاب کررہے تھے۔ آزادی کے 73برسوں بعد پوری دنیا کی توجہ ہم نے اپنی طرف راغب کرنےمیں کامیابی حاصل کی ہے۔ ترقی ، غربت کا ازالہ ، دیہاتوں کو بجلی ، پینے کا پانی سپلائی جیسے کئی ایک سہولیات کو بہم پہنچانے میں ہم سب سے آگے ہیں۔ اس کے علاوہ ہم نے خلاء میں چندریانا2منصوبے کے تحت بہتر اور اعلیٰ قسم کی ترقی کی ہے۔ ہم سب کو ملک کی تعمیر ، مضبوطی اور استحکام جیسے اہم کاموں میں مصروف رہنے کی اپیل کی۔
بھٹکل کے رکن اسمبلی سنیل نائک صدارتی خطاب کرتے ہوئے کہاکہ آزادی کے جشن سےپہلے قحط سے متاثر تھے تو اس کے بعد سیلاب کا سامنا ہے۔ ان حالات میں ضلع انتظامیہ ، تعلقہ انتطامیہ ، تنظیمیں ، ادارے اور عوام کے تعاون سے ہم سب ان سنگین حالات کا سامنا کرتے ہوئے آگے بڑھ رہے ہیں۔ پروگرام میں کنڑا میڈیم سے سرکاری ہائی اسکول میں اول مقام حاصل کرنے والےاین جے درشن ، لوہیت کمار این نائک، شویتا وئیدیا کو حکومت کی جانب سےلیاپ ٹاپ کا تحفہ دےکر عزت افزائی کی گئی ۔ اسی طرح اردو میڈیم سے تعلقہ کو اول ، دوم اور سوم مقام پائے صبغت اللہ ، زلفہ ، نفیہ بانو ، انگریزی میڈیم میں تعلقہ لیول پر اول، دوم اورسوم مقام حاصل کرنے والے چئتالی موگیر، انکت بھٹ اور شردھا پربھو ، اوشا نائک کی تہنیت کی گئی ۔
پروگرام میں استاد شری دھر شیٹھ نے استقبال اور نظامت کے فرائض انجام دئیے۔ تحصیلدار وی پی کوٹرولی ، ڈی وائی ایس پی ولنٹائن ڈیسوزا، سی پی آئی گنیش کے ایل ، تعلقہ پنچایت افسر لکشمی نارائن سوامی ، جالی پنچایت چیف آفیسر وینوگوپال شاستری ، بھٹکل بلدیہ چیف آفیسر دیوراج، جالی پنچایت صدر آدم شیخ، بی ای اؤ مونجی ، وغیرہ موجود تھے۔
نیو انگلش اسکول کی طالبات نے قومی ترانہ اور کسان ترانہ پیش کیا۔ بارش کے چلتے یوم آزادی کے موقع پر چلنے والا پولس ، این سی سی ، اسکاؤٹ گائڈس اور طلبا کے مارچ پاسٹ پروگرام منسوخ کیاگیا۔ بھٹکل کے اے سی ساجد ملا نے سواری کے ذریعے سلامی لی۔ دیہی پولس تھانہ سب انسپکٹر روی جی نے پریڈ کی نگرانی کی۔