بھٹکل: کورونا سے کاروبار زندگی متاثر، تجارتی سرگرمیاں لاک ڈاون کی نظر۔ پھیکی ہوگی اس بار کی بھی عید
بھٹکل 6/مئی (ایس او نیوز) گزشتہ سال کی طرح امسال بھی کور و نا وائرس کے ساۓ میں عید الفطر کی تیاریاں شروع ہوچکی ہیں ، کیوں کہ بھٹکل شہر کے عوام کی ہمیشہ سے یہ روایت رہی ہے کہ ماہ شعبان میں ہی عیدالفطر کی تیاریاں شروع کر دیتے ہیں لیکن اس بارعید کی تیاریوں کے حوالے سے ماضی کی طرح جوش وجذ بہ نظر نہیں آیا ، جس کی سب سے بڑی وجہ کورونا وائرس کی وباء سے پیدا ہونے والے معاشی مسائل ہیں ، ہندوستان سمیت پوری دنیا میں کووڈ 19 کی نئی لہر سے جہاں عالمی تجارتی نظام درہم برہم ہے وہاں ترقی پذیرممالک کی معیشت بھی شدید بحران سے دو چار ہے۔ ہندوستان میں بھی کورونا وائرس کی نئی لہر سے جہاں دیگر کاروبار زندگی متاثر ہے وہاں تجارتی سرگرمیاں بھی ماند پڑ چکی ہیں ۔ جس کی سب سے بڑی وجہ کورونا کی وباء کے باعث بڑھتی ہوئی بیروزگاری ہے کیونکہ کووڈ 19 میں گزشتہ ایک سال سے زائد عرصے کے دوران مختلف شعبوں سے تعلق رکھنے والے کروڑوں لوگ بیروزگار ہو چکےہیں۔
بڑھتی بیروزگاری اور ہوشر با مہنگائی کے باعث لوگوں کی قوت خرید جواب دے گئی ہے جس کے باعث رواں سیزن میں ماہ شعبان میں عید الفطر کیلئے خریداری کیلئے کمی دیکھنے میں آئی ہے کیونکہ 15 سے 25 شعبان تک ان سلے زنانہ ومردانہ کپڑوں کی خریداری مکمل کر لی جاتی تھی اور بیشتر ٹیلرس رمضان کے پہلے یا دوسرے ہفتے میں کپڑوں کی سلائی کیلئے بکنگ بند کر دیتے ہیں، لیکن رواں سیزن میں کپڑا مارکٹ ہی بند رہی جس کی وجہ سے ٹیلروں کو بھی کپڑوں کی سلائی کا کام نہ ملنے سے ٹیلرس کو سخت نقصان پہنچا ۔
عید الفطر کی تیاری محض نئے کپڑوں اور جوتوں کی خریداری تک محدودنہیں ہے بلکہ ماہ شعبان میں بیشتر شہری اپنے گھروں کو نیارنگ کراتے ہیں ، نئے فرنیچر کی خریداری اور دیگر گھر یلوڈ یکوریشن آئٹمز کی خریداری کو بھی ترجیح دیتے ہیں ،لیکن گزشتہ ایک سال سے جاری کورونا وائرس کی وباء کے نتیجے میں بڑھتی بیروزگاری اور ہوشر با مہنگائی کے نتیجے میں عید الفطر کی روایتی تیاریوں میں کمی نظر آ رہی ہے ۔
اس بار لاک ڈاون کے چلتے بھٹکل رمضان بازار میں خریداری مکمل طور پر بند ہے ۔عیدالفطر جہاں ایک مذہبی تہوار ہے وہیں یہ معاشی اعتبار سے خاصا اہم موقع ہوتا ہے، اس عید کو مسلم مما لک میں خریداری کا ایک بڑاسیزن بھی سمجھا جا تا ہے۔ مگر گذشتہ سال کی طرح امسال بھی رمضان کے ماہ میں ہی کورونا لاک ڈاون نافذ ہونے کی وجہ سے اس بار بھی مسلمان عید الفطر کی نماز عیدگاہ یا مساجد میں ادا نہیں کر سکیں گے اور پھر ایک بار یہ عید پھیکی پھیکی ہی منانی ہو گی۔
