بھٹکل ،30 /  مارچ (ایس او نیوز) بھٹکل کے ایک معروف کرکٹ کھلاڑی نے اب ای اسپورٹس میں اپنے جوہر دکھاتے ہوئے نیشنل ای اسپورٹس چمپیئن شپ(این ای ایس سی) 2023 مقابلوں میں ای - فٹ بال کے  زمرے میں نیشنل چمپیئن شپ جیت لی ہے اور آئندہ رومانیہ میں جو 15 ویں ورلڈ چمپیئن شپ (ڈبلیو ای سی) مقابلے ہونگے اس میں ہندوستان کی نمائندگی کا موقع حاصل کیا ہے ۔ 
    
خیال رہے کہ کھیل کے مختلف زمروں میں ای اسپورٹس نیشنل اور انٹرنیشنل سطح پر ہر سال منعقد ہوتے ہیں جس میں ای- فٹ بال بھی ایک اہم زمرہ ہے ۔  اس نیشنل لیول مقابلے میں ملک بھر سے ای - فٹ بال کے 40 سے زائد کھلاڑیوں نے حصہ لیا تھا اور ہر ایک کا مقصد اس چمپیئن شپ کو جیت کر رومانیہ میں ہونے والی ورلڈ چمپیئن شپ کے لئے اپنی جگہ بنانا تھا ۔ مگر قسمت نے ابراہیم گلریز کا ساتھ دیا اور اس نے بازی جیت لی ۔ 
    
ای اسپورٹس فیڈریشن آف انڈیا نے اپنے جاری کردہ بیان میں کہا ہے کہ " گلریز نے ای فٹ بال چمپیئن بننے کے لئے لوزرس بریکیٹ سے اپنی جدوجہد شروع کی، بھرپور استقامت اور اعلیٰ  معیار کے کھیل کا مظاہرہ کیا ۔ اس نے سابقہ چمپیئن کوئنٹن ڈیسوزا کو پہلے راونڈ میں 3-2 اور دوسرے راونڈ میں 3-0  سے شکست دیتے ہوئے پہلی مرتبہ ورلڈ چمپیئن شپ کے لئے کوالیفائی کیا ۔" 
    
نیشنل چمپیئن شپ جیتنے کے بعد جب منتظمین نے ابراہیم گلریز سے اس کے احساسات پوچھے تو اس نے کہا :" سچ میں یہ بہت حیران کن ہے ۔  میں یہ شاندار کارنامہ انجام دینے کے لئے پچھلے دو چار برسوں سے کوشش کر رہا تھا ۔ اور بالآخر اب میں نے اس مقام کو حاصل کرلیا ہے تو یہ حیرتناک محسوس ہو رہا ہے ۔ میری جیت کچھ میری محنت اور کچھ قسمت کا ملا جلا نتیجہ ہے ۔ پچھلے دو چار سیزنس سے اتنی سخت محنت اور کوشش کرنے کے بعد مقابلہ جیتنے کی اس خوشی کو آپ صرف محسوس کر سکتے ہیں ۔"
    
رومانیہ میں ای - اسپورٹس کے مختلف زمروں میں ورلڈ چمپیئن شپ کے 15 ویں مقابلے 24  اگست سے 4 ستمبر 2023 تک منعقد ہونگے ۔ جس میں ای - فٹ بال ، ڈونا 2 ، ٹیکّن 7، موبائل لیجنڈس، پب جی : موبائل 2 اور سی ایس : جی او کے زمروں میں جملہ 130 ممالک کے نمائندہ کھلاڑی حصہ لیں گے اور یہ اب تک کا سب سے بڑا مقابلہ ثابت ہونے جا رہا ہے ۔  ان مقابلوں کے لئے مجموعی طور پر جملہ 5 لاکھ امریکی ڈالرس ( تقریباً 4.12 کروڑ روپے) کے انعامات کا اعلان کیا گیا ہے ۔