بھٹکل بلاک کانگریس کی طرف سے 12ستمبر کو مرکزی حکومت کے خلاف احتجاج
بھٹکل:11؍ستمبر(ایس اؤ نیوز)ریاست کے شمالی کرناٹکا میں سیلاب سے ہوئے کافی جانی و مالی نقصانات ہونے کے باوجود مرکزی حکومت کی طرف سے ایک پیسہ بھی امداد کے طورپر منظور نہیں کیاگیاہے۔ مرکزی حکومت کی نظراندازپالیسی کی مذمت کرتے ہوئے بھٹکل بلاک کانگریس کی طرف سے 12ستمبر کو شہر میں احتجاج ہوگا۔
بلاک کانگریس صدر سنتوش نائک نے پریس ریلیز جاری کرتےہوئے کہاہےکہ اترکنڑا ضلع سمیت شمالی کرناٹکا کے کئی اضلاع میں موسلادھار بارش اور ڈیموں سے پانی چھوڑے جانےکےنتیجےمیں جو سیلاب آیا اور اس سے جانی ومالی نقصانات ہوئے ہیں وہ سب کے سامنے ہے، عوام آج بھی تکالیف و پریشانیوں کو جھیل رہےہیں ایسے میں ابھی تک مرکزی حکومت کی طرف سے ایک پیسہ بھی بطور امداد نہیں دیاگیا ہے ، انہی وجوہات کی بنا پر مرکزی حکومت کی پالیسی کےخلاف احتجاج کرنے کی بات کہتے ہوئے کانگریس لیڈران، کارکنان سے کہا ہےکہ مرکزی حکومت کے خلاف اعلان کئے گئے احتجاج میں لازماً شرکت کریں۔