بھٹکل2/مئی (ایس او نیوز) اپنی گلوکاری، اداکاری اور دل خوش کرنے والی بات سے لوگوں کا دل جیتنے والے بھٹکل مُنڈلّی کے رہائشی نابینا کلاکار شائیل اینتھونی گومز نے ایس ایس ایل سی امتحان میں 70 فیصد مارکس اسکور کرتے ہوئے اپنے والدین اور چاہنے والوں کے لئے شادمانی کا موقع فراہم کیا ہے۔

 شائیل گومز نے کنڑا میں 76، انگریزی میں 65، سوشیالوجی میں 92،پولیٹکل سائنس میں 65، ہندی میں 83اورسماجی تعلیم میں 44مارکس حاصل کیے ہیں۔دونوں آنکھوں کی بینائی سے محروم شائیل نے حساب اور سائنس کے مضمون کے بدلے میں پولیٹکل سائنس اور سوشیالوجی کے مضامین چن لیے تھے۔ معذور بچوں کے لئے امتحان دینے کے قوانین کے مطابق منڈلّی کے اسکول میں شائیل کو امتحان دینے کے لئے اس سے کم درجے میں پڑھنے والے یعنی ۹ ویں جماعت کے دیا نند نامی ایک طالب علم کو معاون کے طور پر فراہم کیا گیا تھا۔ شائیل کی طرف سے سوالات کے جوابات زبانی بتانے پر اس کے معاون نے اسے جوابی پرچے پر لکھنے کا کام انجام دیا۔

 شائیل نے منڈلّی کے جس اسکول سے امتحان دیا، اس اسکول میں پڑھائی کرنے والے عام بچوں میں سے28طلبہ نے ایس ایس ایل سی کا امتحان پاس کیا۔لیکن خاص بات یہ ہے کہ ان میں سے 20طلبہ ایسے ہیں جنہوں نے شائیل سے کم مارکس حاصل کیے ہیں اور ان کا فیصد 70سے کم آیا ہے۔شائیل کے بارے میں معلوم ہواہے کہ اس نے اپنے گھر پر ہی برائیل طرز تحریر میں پڑھائی کرتے ہوئے اپنے امتحان کی تیاری کی تھی۔جبکہ نوٹس تیار کرنے میں اس کی والدہ لیلا اس کی مدد کیا کرتی تھی۔شائیل کو پڑھانے والے مادیوا نائک نے شائیل کے قوت حافظہ کی تعریف کرتے ہوئے کہا کہ دوسرے طلبہ کو  جس طرح پڑھایا جاتا ہے اس طرح شائیل کو نہیں پڑھایا جاسکتا۔ لیکن ہم اسے جوبات بھی سمجھاتے، اسے وہ پوری طرح یاد کرلیتا تھا۔انہوں نے کہا کہ شائیل کی کامیابی سے ہمیں بھی فخر محسوس ہورہا ہے۔

 معلوم ہواہے کہ شائیل اب گروسدھیندرا کالج میں پی یوسی کی آرٹس فیکلٹی میں داخلہ لینا چاہتا ہے۔حال ہی میں معذور بچوں کی زندگی پر بنی کنڑا فلم ’ویروپا‘ ریلیز ہوئی تھی جس میں شائیل نے اداکاری کی ہے۔شائیل کی اس کامیابی پر اس کے چاہنے والوں نے ستائش کرتے ہوئے شاندار مستقبل کے لئے نیک خواہشات کا اظہار کیا ہے۔