بھٹکل :24؍فروری(ایس اؤ نیوز)تعلقہ کے بیلکے گرام پنچایت حدود کے گورٹے کراس کے قریب نجی زمین پر بار اینڈ ریسٹورنٹ کی شروعات  کے لئے پس پردہ کوششیں جاری ہیں۔ اس کو کسی حال میں بھی منظوری نہ دینے کا مطالبہ لے کر علاقہ کے عوام نے بھٹکل اسسٹنٹ کمشنر کو میمورنڈم سونپا۔

میمورنڈم میں تحریر کیاگیا ہے کہ جس زمین پر بار اینڈ ریسٹورنٹ کھولا جارہاہے اس کے قریب ہی اسکول ہے،روزانہ  اسکول اور کالج کے بچے اسی راستے سے گزرتے ہیں، متعلقہ روڈ پر غیرقانونی شراب کی دکان بھی ہے، وہاں موجود جھاڑیوں کے نیچے بیٹھ کر شراب پینا عام ہے، اب وہاں سرکاری منظوری کے ساتھ بار اینڈ ریسٹورنٹ شروع کیا جاتاہے تو سماجی صحت پر اور بھی برے اثرات مرتب ہونگے۔ بچے ، نوجوان بھی نشے کے عادی بن سکتے ہیں۔ پڑوس کی سڑک سے روزانہ کانمدلو، گنجی کیری، ہوسگدے سمیت کئی دیہاتوں کو آنے جانے والوں کے لئے پریشانی ہوگی۔ غریب لوگ اپنی کمائی کا پیسہ شراب پر خرچ کریں گے تو زندگی کیسے چلے گی۔ مجموعی طورپر عوامی زندگی برباد ہوجائے گی۔ اس سلسلےمیں افسران کڑے اقدام اٹھاتے ہوئے باراینڈ ریسٹورنٹ کو منظوری نہ دیں۔ اگر پروانہ دیاگیا تو سخت احتجاج کرنےکی عوام نے دھمکی دی ہے۔ اے سی دفتر کے افسر ایل اے ہیگڈے نے میمورنڈم وصول کیا۔ اس موقع پر گریش نائک، ناگپا نائک، رامانائک، ہونپا نائک، دیویندر نائک، چندراوتی نائک، للتا نائک وغیرہ موجود تھے۔