بھٹکل:20؍جنوری(ایس اؤ نیوز)گزشتہ 4جنوری کو دن دہاڑے تعلقہ کے بیلکے کنچی کیری کےمکین ناگراج گنپتی ہیگڈے کے گھر کا دروازہ توڑ کر نقد رقم اور زیورات چراکر فرار ہونے کے الزام میں پولس نے ایک شخص کو گرفتارکرلیا ہے اور اُس کے پاس موجود 38.54گرام سونے کے زیورات برآمد کرنے میں پولس کامیاب ہوگئی ہے۔
پریس ریلیز جاری کرتے ہوئے پولس نے بتایا کہ گرفتارشدہ ملزم کی شناخت منکی کے رہنے والے ولسن عرف بالا پیداد لوپیز (28) کی حیثیت سے کی گئی ہے جو فی الوقت کنداپور کے کوٹیشور میں رہائش پذیر تھا۔
یاد رہے کہ چوری کو لےکر گھر کے مالک ناگراج ہیگڈے نے 75ہزار روپئے نقد اور 16گرام وزنی سونے کی چین، 2 انگوٹھیاں، ایک جوڑا آویزے چوری ہونے کے متعلق پولس تھانے میں شکایت درج کرائی تھی۔ ضلع پولس ایس پی شیوپرکاش دیوراج ، اے ایس پی نکھیل ، سی پی آئی ایم ایس پرکاش کی رہنمائی میں بھٹکل دیہی پولس تھانہ ایس آئی اومکارپا ، اے ایس آئی منجوناتھ بی گوڈر، عملہ مہیش پٹگار، ارون پنٹو، ستیہ نند نائک وغیرہ کی ٹیم نے کارروائی کرتے ہوئے ملزم کو گرفتارکرنے میں کامیابی حاصل کی ہے۔
بتایا گیا ہے کہ منکی میں ہوئے ایک اور چوری کی واردات کے متعلق بھی ملزم نے زبان کھولا ہے۔ بھٹکل دیہی پولس تھانے میں کیس درج کرلینے کے بعد مزید جانچ کی جارہی ہے۔