بھٹکل:22/ستمبر(ایس اؤ نیوز) اترکنڑا ضلع پی یو بورڈ تعلیمات عامہ ، وائی ٹی ٹی ایس پی یو کالج یلاپور اور سرکاری پی یو کالج یلاپور کے اشتراک سے یلاپور سرکاری پی یوکالج کے کالما تعلقہ کھیل میدان میں منعقدہ پی یو کالج ضلع لیول کبڈی ٹورنامنٹ میں انجمن پی یو کالج بھٹکل نے ساحل عمری کی قیادت میں شاندار کھیل کا مظاہرہ پیش کرتے ہوئے چمپئین شپ کا خطاب جیت کر کالج اور شہر کا نام روشن کردیا ہے۔
اس سلسلے میں کالج فزیکل ڈائرکٹر کلیم اللہ نے بتایا کہ کبڈی ٹورنامنٹ میں ضلع کی کل 11کالج ٹیمو ں نے شرکت کی تھی ۔ انجمن کالج ٹیم نے پہلے میچ میں منڈگوڈ کے ساتھ کھیلتے ہوئے 15-60سے آسان جیت درج کی تو دوسرے راؤنڈ میں سرسی کو 07-15سے مات دے کر فائنل میں پہنچی ۔ فائنل انجمن پی یوکالج بھٹکل اورہلیال کی پی یو کالج ٹیم کے درمیان مقابلہ ہوا۔ جس میں بھٹکل کالج کی ٹیم نے ہلیال کو 10-22سے شکست دے کر چمپئین شپ کا خطاب جیتا۔
انجمن پی یو کالج ٹیم کی کپتانی ساحل عمری کررہے تھے تو عبدالباری رکن الدین ٹیم کے نائب کپتان تھے۔ ٹورنامنٹ میں کپتان ساحل عمری کو بیسٹ آل راؤنڈر، نائب کپتان عبدالباری رکن الدین کو بیسٹ کیچر اور محمد ابرار کو بیسٹ رائیڈر کے خطاب سے نوازا گیا۔
انجمن کالج ٹیم کی بہترین کارکردگی پر انجمن کے صدر عبدالرحیم جوکاکو، جنرل سکریٹری صدیق اسماعیل، ایڈیشنل جنرل سکریٹری اسحق شاہ بندری، کالج بورڈ سکریٹری محسن شاہ بندری ،دیگر عہدیداران و ممبران اور پرنسپال محمد یوسف کولا سمیت اساتذہ وغیرہ نے کالج ٹیم اور فزیکل ڈائرکٹر کے کلیم اللہ کو مبارکباد پیش کی ہے۔