بنگلورو:25؍فروری(ایس اؤ نیوز)بنگلورو میں22فروری کو منعقدہ اسوسی ایشن آف مسلم پروفیشلنس (اے ایم پی ) کے تیسرے سالانہ دوروزہ کنوینشن میں انجمن حامئی مسلمین بھٹکل کے سابق صدر محترم عبدالرحیم جوکاکو کو سال 2019کے’ ایکسلنس ان ایجوکیشن ‘ تعلیمی ایوارڈ سے نوازتے ہوئے ان کی تہنیت کی گئی ۔
مسلمانوں کی تعلیمی ترقی کے لئے سرگرم شخصیات اور اداروں کو ہر سال ایوارڈ دئیے جاتے ہیں۔ انجمن حامئی مسلمین بھٹکل کے ذریعے پچھلے کئی برسوں سے ادارے کے نائب صدر، جنرل سکریٹری اور صدر جیسے کلیدی عہدوں پر فائز رہتےہوئے اپنی خدمات انجام دینے والے بھٹکل کی اہم شخصیت عبدالرحیم جوکاکو کی تعلیمی خدمات کا اعتراف کرتے ہوئے انہیں قومی تعلیمی ایوارڈ سے نوازاگیا ہے۔
ایوارڈ سے نوازے جانےکے بعد انہوں نے اللہ کا شکر ادا کرتےہوئے کہاکہ دراصل یہ ایوارڈ مجھے نہیں بلکہ انجمن میں رہتے ہوئے جو تعلیمی خدمات انجام دی گئی ہیں اس بنیاد پر یہ ایوارڈ ملا ہے۔ اس موقع پر انہوں نے انجمن کے عہدیداران ، ممبران سمیت قوم کے سبھی افراد کا شکریہ ادا کرتےہوئے کہاکہ ان سب کے تعاون سے ہی یہ ممکن ہوا۔
خیال رہے کہ مسلمانوں کی ہمہ جہت ترقی کے ساتھ خاص کر تعلیم ، روزگار اور معاشی ترقی کا مقصد لے کر طویل المدت اورقلیل المدت منصوبہ بندی کے ساتھ میدان عمل میں سرگرم اسوسی ایشن کے اس دو روزہ کنوینشن میں ملک اور بیرون ملک سے قریب 200 ارکان شریک تھے۔