بھٹکل : ذہنی و جسمانی طورپر صحت مند اساتذہ معاشرے کا ستون ہیں : آئیٹا کےزیراہتمام مفت ہیلتھ چیک آپ کیمپ
بھٹکل:25؍ ستمبر(ایس اؤ نیوز)اساتذہ ذہنی اور جسمانی سطح پر صحت مند رہیں گے تو صحت مند معاشرےکی تعمیر بھی ممکن ہوگی۔ صحت مند اساتذہ ہی صحت مند معاشرے کا مضبوط ستون ہوتا ہے۔ ان خیالات کا اظہار دعوت سینٹر کے سکریٹری مولانا سید زبیر نے کیا۔
اتوار کو ویلفئیر اسپتال میں آل انڈیا آئیڈیل ٹیچرس اسوسی ایشن (آئیٹا)اور ویلفئیر اسپتال کی جانب سے اسکول ٹیچروں کے لئے منعقدہ مفت صحت چیک اپ کیمپ کا افتتاح کرتے ہوئے مولانا نےکہاکہ اسلام نے صحت کو ترجیح دیتےہوئے بہتر رہنمائی کی ہے ، اساتذہ کےلئے ضروری ہے کہ وہ صرف جسمانی سطح پر ہی نہیں بلکہ ذہنی سطح پر بھی صحت مند رہیں۔
آئیٹا کے ریاستی صدر محمد رضامانوی نے افتتاحی کلمات پیش کرتےہوئے کہاکہ آئیٹا کی جانب سے 16سے 25ستمبر تک’ صحت مند استاد صحت مند تعلیم ‘کے موضوع پر مہم منائی جارہی ہے ۔ اساتذہ کے متعلق محکمہ تعلیم اور صحت عامہ کی طرف سے پیش کردہ رپورٹ اساتذہ کو فکر مند کئے ہوئےہے۔ 60فی صد سے زائد اساتذہ بی پی ، شوگر، کڈنی اور کینسر جیسی بیماریوں میں مبتلا ہیں جس کے چلتے ذہنی دباؤ میں اضافہ ہورہاہے۔ اور ا س کا نتیجہ فطری طورپر تعلیم پر بھی ہوگا۔ انہی وجوہات کی بنا پر آئیٹا ریاست گیر مہم مناتےہوئے اساتذہ کے درمیان صحت کے متعلق بیداری پید اکررہی ہے۔ اس موقع پرجماعت اسلامی ہند بھٹکل کے معاون امیر مقامی مجاہد مصطفیٰ اور نیو شمس اسکول کے پرنسپال لیاقت علی نےبھی اپنے خیالات کا اظہارکیا۔ آئیٹا اترکنڑا ضلعی صدر علی منیگار نے شکریہ اداکیا۔ نوائط کالونی سی آرپی منیرہ خانم ، ویلفئیر اسپتال کے ابوالاعلیٰ ، داکٹر شکیہ ، ڈاکٹر انجم، غالب اوٹی وغیرہ موجود تھے۔