بھٹکل 13/اکتوبر(ایس او نیوز) بھٹکل کے نسچل مکھی وینکٹ ر ا منا مندر میں اکھل کرناٹکا جن جاگرتی ویدیکے، دھرمستھلا گرام ابھیرودّی یوجنے بی سی ٹرسٹ (رجسٹرڈ)شمالی کینرااور کرناٹکا راجیہ مدھیہ پان سمیم منڈلی بنگلوروکے اشتراک سے ضلعی سطح پر گاندھی سمرتی، جن جاگرتی جتھا اور شراب کی لت چھوڑنے والوں کے لئے تہنیت کا ایک پروگرام منعقد کیا گیا۔

 پروگرام کا افتتاح کرتے ہوئے سابق رکن اسمبلی جے ڈی نائک نے کہا کہ شراب نوشی تشدد پر ابھارتی ہے۔ ہمیں شراب کی لت چھوڑنے کی مہم خود اپنے اپنے گھروں سے شروع کرنی ہوگی۔ بلدیہ کے سابق صدر عنایت اللہ شا ہ بندری نے کہا کہ شراب سے چھٹکارا پانے کے حکومت کے پروگرام کو عوام گھر گھر پہنچا رہے ہیں۔اپنے خدا پر بھروسہ اور عقیدت، تعلیم اور خدمت کا جذبہ ہر ایک انسان کے دل میں بیدار ہوجائے تو گھر، شہر اور ملک کا بھلا ہوسکتا ہے۔چیدانند پٹگارنے شراب کی لت اور اس سے چھٹکارا پانے کے سلسلے میں خطاب کیا۔ 

اس موقع پر شراب سے لوگوں کو چھٹکارا دلانے کی مہم چھیڑنے والے ہوناور کے کرشنا ہریجن اور بھٹکل کے ناگ راج کنچو گار جوڑوں کو  ’جنا جاگرتی انّا‘ اور ’جاگرتی مترا‘ کے اعزاز سے نوازا گیا۔ اس جلسے کی صدارت ضلع جنا جاگرتی ویدیکے کے صدر گنگا دھر بھٹ نے کی۔ 

اجلاس سے قبل بھٹکل کے آنند آشرم میدان سے ایک ریالی نکالی گئی جو نیشنل ہائی وے سے ہوتی ہوئی چنا پٹن ہنومنتھا مندرکے پاس گزری اور پھر وینکٹ رمنا مندر اسارکیری پہنچ کر اجلاس میں تبدیل ہوگئی۔ ریالی کے دوران کئی لوگ گاندھی کا روپ دھارے ہوئے پوشاکوں میں ملبوس،شراب پر پابندی کے سلسلے میں پمفلیٹس بانٹتے اور بینڈ بجاتے نظرآئے۔