بھٹکل 13 اگست (ایس او نیوز)   یہاں نوائط کالونی میں  دبئی کے معروف تاجر جناب عتیق الرحمن  مُنیری کی طرف سے ان کے والد مرحوم الحاج محی الدین مُنیری کے نام سے موسوم  ایک ہائی ٹیک ایمبولنس کا خوبصورت افتتاح عمل میں آیا جس میں بھٹکل کی سرکردہ شخصیات سمیت علماء و عمائدین   موجود تھے۔

بتایا گیا ہے کہ اس ایمبولنس میں  وینٹی لیٹر کی  سہولت ہے۔  اس مناسبت سے وینٹی لیٹر سے لیس بھٹکل میں یہ پہلی ایمبولنس ہے۔ ایمبولنس کی دیکھ ریکھ کی ذمہ داری نوائط کالونی کی سرگرم اسوسی ایشن  وائی ایم ایس اے (ینگ مسلم  سروس اسوی ایشن) کو دی گئی ہے۔

اپنے والد کے ایصال ثواب کے لئے  جاری کی گئی اس ایمبولنس کے تعلق سے گفتگو کرتے ہوئے جناب عتیق الرحمن مُنیری نے بتایا کہ  بھٹکل میں ایک تو مناسب    اسپتال نہیں ہیں، کوئی بھی  حادثہ پیش آنے کی صورت میں  یا کوئی بھی ایمرجنسی کی صورت میں مریضوں کو  پڑوسی علاقوں کنداپور، اُڈپی یا مینگلور منتقل کرنا ضروری ہوجاتا  ہے ، ایسے میں اکثر اوقات میں  اشد ضرورت کے موقع پر ایمبولنس دستیاب نہیں ہوتی، دوسری بات یہ کہ  بھٹکل میں جو  دو تین ایمبولنس موجود ہے،  وہ ہر طرح کی طبی سہولیات سے لیس نہیں ہیں ۔   البتہ آج  ہم نے جس ایمبولنس کا افتتاح کیا ہے، اُس میں گیس سلینڈر سمیت وینٹی لیٹر کی بھی سہولت   رکھی گئی ہے ساتھ ساتھ  مریض کی دیکھ ریکھ کے لئے نرس کا بھی انتظام ہوگا۔ جس کی وجہ سے مریضوں کو بحفاظت دور دراز شہروں میں لے جانے میں آسانی ہوگی۔

مقامی ڈاکٹر سمیع اللہ  نے ربن کاٹ کا ایمبولنس کا افتتاح کیا، اس سے قبل   ایک افتتاحی تقریب رکھی گئی تھی جس میں  بھٹکل کے علماء حضرات نے اپنے اپنے تاثرات پیش کئے۔ حافظ حسن رباح  عسکری  کی تلاوت سے  تقریب کا آغاز ہوا،  مولانا عبدالعظیم قاضیا ندوی کی دُعا پر جلسہ برخواست ہوا۔ وائی ایم ایس اے کے جنرل سکریٹری  مولوی رحمت اللہ رکن الدین ندوی  نے پروگرام کی نظامت کی۔