بھٹکل 24/اکتوبر (ایس او نیوز) عفان جبالی مرڈر کیس کے تعلق سے بھٹکل پولس نے مینگلور کے قریبی علاقہ بنٹوال سے ایک شخص کو گرفتار کرلیا ہے جس کی شناخت محمد سراج (32) کی حیثیت سے کی گئی ہے۔ اسے جمعرات کو عدالت میں پیش کیا گیا ہے۔ اس گرفتاری کے ساتھ ہی عفان جبالی مرڈر معاملے میں دوسرے شخص کی گرفتاری عمل میں آئی ہے اور پولس کو مزید چار لوگوں کی تلاش ہے جن کے تعلق سے بتایا گیا ہے کہ وہ واردات کے بعد روپوش ہوگئے ہیں۔
یاد رہے کہ 19/اکتوبر کی شب کو بھٹکل نیشنل ہائی وے پر واقع ایک ہوٹل سے بھٹکل موگلی ہونڈا کے رہنے والے محمد عفان جبالی کی نعش برآمد ہوئی تھی جس کے تعلق سے اُس کے بھائی نبیل نے بتایا تھا کہ عفان کو قتل کرکے ایک تھیلے میں بند کرکے رکھا گیا تھا۔
بتایا گیا تھا کہ عفان کو ایک تھیلے میں بند کرکے کہیں اور لے جاکر پھینکنے کی تیاری کی جارہی تھی، مگر ہوٹل میں موجود کسی ایک ساتھی نے عفان کے بھائی کو خبر دی کہ عفان کا اغوا کرکے اُسے کہیں لے جانے کا منصوبہ متعلقہ ہوٹل میں چل رہا ہے۔ جیسے ہی عفان کا بھائی نبیل متعلقہ ہوٹل پہنچا، اُسے عفان کی نعش ایک تھیلے میں ملی، جس کے ہاتھ اور پیر بندھے ہوئے تھے۔
مرڈر کیس کو حل کرنے کے لئے ضلع کے ایس پی شیو پرکاش دیوراج نے پولس کی ایک ٹیم ترتیب دی ہے جو اس معاملے کو حل کرنے میں لگی ہوئی ہے۔
خیال رہے کہ سنیچر 19/اکتوبر کی شب کو جس دن عفان کا قتل ہوا تھا، اُسی وقت عوام نے دو لوگوں کو جائے وقوع پر ہی دھر دبوچ کر پولس کے حوالے کردیا تھا۔ جن کی شناخت موگلی ہونڈا کے رہنے والے محمد اقبال شیخ اور مخدوم کالونی کے محمد عفان کی حیثیت سے کی گئی تھی۔ بتایا گیا تھا کہ دیگر پانچ لوگ فرار ہوگئے ہیں جن کا تعلق منگلور یا اطراف کے علاقوں سے ہے، اُسی تعلق سے آج بنٹوال کے رہنے والے سراج کو گرفتار کیا گیا ہے۔ پولس نے بتایا تھا کہ عفان جبالی مرڈر کیس کے تعلق سے صرف ایک محمد اقبال شیخ کو ہی گرفتار کیا گیا ہے اور مخدوم کالونی کے رہنے والے محمد عفان سے پوچھ تاچھ جاری ہے۔