بھٹکل بندر روڈ پر اسکوٹر اور بائک کی ٹکر؛ ایک خاتون جاں بحق، دو زخمی
بھٹکل 7/ مارچ (ایس او نیوز) یہاں بندر روڈ تھرڈ کراس کے قریب ہوئے ایک سڑک حادثے میں ایک خاتون جاں بحق ہوگئی، جبکہ اس کا شوہر اور دوسری بائک پر سوار نوجوان زخمی ہوگیا۔
بتایا گیا ہے کہ بھٹکل بندر۔روڈ تھرڈ کراس سے میاں بیوی جن کی شناخت ریحانہ اور اشفاق دامدا کی حیثیت سے کی گئی ہے، اسکوٹر پر سوار، بندر۔روڈ تھرڈ کراس سے باہر آکر بندر روڈ کو کراس کرتے ہوئے آسیہ اسپتال جانے والے روڈ کی طرف آگے بڑھ رہے تھے کہ اچانک بیلنی سے سرکل کی طرف جانے والی ایک تیز رفتار بائک ان کی اسکوٹر سے ٹکراگئی۔ ٹکر اتنی تیز تھی کہ اسکوٹر کی پچھلی سیٹ پر سوار خاتون ریحانہ اشفاق دامدا (48) اُچھل کرقریب میں پارک کی گئی ایک لاری کے قریب جاگری۔ بتایا گیا ہے کہ خاتون کا سر لاری کے کسی حصے سے ٹکراگیا تھا، جس کے نتیجے میں اُس کی موقع پر ہی موت واقع ہوگئی۔ حادثے میں اشفاق دامدا (55) اور بائک سوار دگمبر سدانند نائک (18) کو بھی چوٹ لگی ہے اور دونوں کو قریبی اسپتال میں داخل کیا گیا ہے۔
حادثے کے فوری بعد مقامی پولس موقع واردت پر پہنچی اور جائے وقوع کا جائزہ لیتے ہوئے ضروری کاغذی کاروائیوں کو پورا کیا۔
ٹائون پولس تھانہ میں معاملہ درج کیا گیا ہے اور پولس مزید چھان بین کررہی ہے۔
