بھٹکل ،30 / مارچ (ایس او نیوز) بھٹکل اسمبلی حلقہ میں جملہ 2,19,876 ووٹرس ہیں جن میں  1,11,740 مرد اور 1,08,135 خواتین اور ایک مخنث ووٹرس ہیں ۔ ان میں معذور ووٹرس کی تعداد 2772،  اسّی  سال سے زائد عمر والے  ووٹرس 3323 اور 18 سے 20 سال عمر کے ووٹرس 1703 ہیں ۔ جن لوگوں کے نام ووٹرس لسٹ میں نہیں ہیں وہ لوگ بوتھ لیول آفیسر سے رابطہ کرکے فارم نمبر 6 پُر کرسکتے ہیں ۔    یہ تمام جانکاری بھٹکل اسسٹنٹ کمشنر اور اسمبلی انتخابات کے لئے الیکشن کمیشن آف انڈیا کی طرف سے  نامزد الیکٹورل آفیسر ممتا دیوی نے اپنے دفتر میں منعقدہ پریس کانفرنس میں دی۔بھٹکل ہوناور حلقہ نمبر  79 میں انتخابی تیاریوں اور سرگرمیوں کی تفصیلات فراہم  کرتے ہوئے انہوں نے بتایا کہ بھٹکل تحصیلدار اور ہوناور تحصیلدار معاون الیکٹورل آفیسر کی حیثیت سے خدمات انجام دیں گے ۔

یاد رہے کہ ریاست کرناٹک میں انتخابات کا انعقاد 10مئی بدھ کے دن ہوگا اور ووٹوں کی گنتی اور نتائج کا اعلان 13 مئی کو ہوگا ۔

اسسٹنٹ کمشنر نے بتایا کہ اس اسمبلی حلقہ میں جملہ 248 پولنگ بوتھ ہیں جس میں 14  ورنریبل  (کمزور، جہاں گڑبڑی کے امکانات ہیں) اور 64  کریٹیکل ہیں ۔ پرامن انتخابات کو یقینی  بنانے  کے لئے ہوناور کے گیر سوپا، بھٹکل کے کنٹوانی، سرپن کٹّا اور شیرالی میں چیک پوسٹ بنائے گئے ہیں۔ اس کے علاوہ سیکٹر آفیسرس، فلائنگ اسکواڈ ، ویڈیو سرویلانس ٹیم، ویڈیو ویوینگ ٹیم ، اسٹیٹک سرویلانس ٹیم اور سی ویجیل ٹیمیں تشکیل دی گئی ہیں۔

   مزید بتایاہے کہ پارٹیوں اور امیدواروں کو اپنے تشہیری پروگراموں کے لئے اجازت حاصل کرنے میں سہولت فراہم کرنے کے لئے سنگل ونڈو کمیٹی تشکیل دی گئی ہے ۔ عوام کی طرف سے ملنے والی شکایات قبول کرنے اور اس پر اقدام کرنے  کے لئے 24x7 کام کرنے والا کنٹرول روم  قائم کیا گیا ہے ۔ اس کنٹرول روم سے رابطہ کے لئے مندرجہ ذیل نمبروں پر رابطہ کیا جا سکتا ہے ۔ الیکٹورل آفیسر دفتر بھٹکل -223722  (08385) معاون الیکٹورل آفیسر بھٹکل-226422، ہوناور 220262 ۔(08387)

الیکٹرل آفسر نے بتایا کہ  اس مرتبہ الیکشن کمیشن کی ہدایت کے مطابق 50% یعنی بھٹکل حلقہ کے 124 بوتھوں میں ویب کاسٹنگ ہوگی جس کی نگرانی براہ راست الیکشن کمیشن کرے گا ۔ تمام کریٹیکل بوتھس میں لازمی طور پر ویب کاسٹنگ کی جائے گی ۔ معذورین اور 80 سال سے زائد عمر کے ووٹرس کے لئے ڈاک سے ووٹنگ کی سہولت فراہم کی جائے گی ۔     

انہوں نے بتایا کہ  انتخابات کے اعلان کے ساتھ ہی ریاست بھر میں انتخابی ضابطہ اخلاق لاگو ہوچکا ہے، جس کے مطابق بغیر دستاویز  پچاس ہزار سے زائد رقم  برآمد ہونے پر رقم ضبط کی جائے گی۔

جیسا کہ خبروں میں بتایا گیا تھا کہ 80  سال سے زائد عمر والوں کے لئے گھر پر ہی ووٹنگ کی سہولت فراہم کی جائے گی، اس تعلق سے ممتادیوی نے بتایا کہ  80 سال سے زائد عمر والوں کو گھر پر ہی ووٹنگ کی سہولت پانے کے لئے  12 ڈی  درخواست فارم بھر کر  اپنے پولنگ  بوتھ میں جمع کرانا ہوگا۔

پُرامن پولنگ کے لئے سنٹرل آرمڈ پولیس فورس CAPF کو تعینات کیا جائے گا جو یکم اپریل سے ذمہ داری سنبھالیں گے ۔ 

ووٹنگ لسٹ میں نام کے اندراج یا درخواست کی صورتحال وغیرہ سے متعلق معلومات حاصل کرنے کے لئے NSVP اور ووٹرس پورٹل وزٹ کیا جا سکتا ہے ۔