بھٹکل میں دوسرے دن بھی موسلادھار بارش ، سال رواں کی سب سے زائد بارش ریکارڈ کی گئی؛ ضلع میں سب سے زیادہ بھٹکل میں ہوئی بارش
بھٹکل:10؍جولائی (ایس اؤ نیوز) منگل کی صبح سے جاری موسلا دھار بارش بدھ کی رات تک جوں کی توں اپنی رفتار کے ساتھ جاری رہنےسے تعلقہ بھر میں بعض مقامات پر بجلی کے کھمبوں کے منہدم ہونے ، سڑکیں اور نشیبی علاقے زیر آب ہونے اور عوامی ملکیت کو نقصان ہونے کی اطلاعات موصول ہوئی ہیں۔
قومی شاہراہ پر واقع شمس الدین سرکل اور رنگین کٹے پر پانی جمع ہونے سے کچھ دیر کے لئے ٹرافک نظام متاثر ہوا۔اسی طرح بھٹکل بس اسٹانڈ بارش کی وجہ سے ابتر حالت کو پہنچ گیا۔ چند جگہوں پر اندرونی نالیوں کا پانی سڑکوں پر بہتے دیکھ کر بلدیہ عملہ جائے وقوع پر پہنچ کر پانی کو بہنے کے لئے راستہ بنایا۔ کڈوین کٹا ڈیم اپنے شباب پر ہے ۔محکمہ موسمیات کے مطابق منگل کی صبح 8بجے سے بدھ کی صبح 8بجے تک بھٹکل میں 123ملی میٹر بارش ریکارڈ کی گئی ہے جو اب تک ہوئی بارش میں سب سے زیادہ ہے۔محکمہ موسمیات کے مطابق امسال اب تک بارش کی پیمائش 1051.4 ایم ایم بارش ریکارڈ کی گئی ہے ۔
تعلقہ ہسکام محکمہ کی طرف سے ملی اطلاعات کے مطابق آج صبح سے جاری بارش میں 8بجلی کے کھمبے زمین بوس ہوئے ہیں۔ بیلکے گرام پنچایت حدود کے بیلکے پنچایت دفتر کے قریب 1،شرالی میں 3 اور بائیلور پنچایت حدود کے نیرگدے میں 2بجلی کے کھمبےمنہدم ہوئے ہیں۔ جس کے نتیجے میں محکمہ ہیسکام کو 64ہزارروپئے نقصان ہوا ہے۔
کھپریل اُڑگئے: بدھ کی صبح فی گھنٹہ 40-50کلومیٹر کی رفتار سے چلنےوالی طوفانی ہوا کے نتیجےمیں ساحلی مکینوں کے گھروں کی کھپریل اڑنے کی اطلاع موصول ہوئی ہے۔قریب ایک گھنٹے کے بعد ہوا کا زور کم ہوا تو عوام نے تھوڑی راحت کی سانس لی ، البتہ رات تک ہوا کے ساتھ بارش کا برسنا جاری تھا۔ اترکنڑا ضلع میں گزشتہ 24گھنٹوں میں کل 786.2ملی میٹر بارش ریکارڈ کی گئی ہے۔ جولائی کے مہینےمیں عام طورپر بارش 991 ایم ایم بارش کی پیمائش کی گئی ہے۔ امسال جولائی میں ابھی تک 344.2 ایم ایم بارش درج کی گئی ہے۔ جس میں سب سے زیادہ بارش بھٹکل میں 123 ملی میٹر بارش درج کی گئی ہے اسی طرح سب سے کم بارش ہلیال میں 18ایم ایم بارش ریکارڈ کی گئی ہے۔ اسی طرح ضلع کے ڈیموں کے پانی کی سطح میں بھی لگاتار اضافہ ہونےکی محکمہ موسمیات نے جانکاری دی ہے۔
