بھٹکل:27؍ جنوری(ایس اؤ نیوز ) عالمی یومِ کینسر کی مناسبت سے 5 فروری کو بھٹکل میں کینسر کے متعلق عوام میں بیداری پیدا کرنے کے مقصد سے میراتھن 2023 کا انعقاد کیا جارہا ہے جس کے لئے عوام الناس سے درخواست کی گئی ہے کہ اس میراتھن میں شریک ہوں۔
کریا شیل گلئیر سنگھا، محکمہ پولس بھٹکل ، محکمہ صحت عامہ سمیت مختلف سماجی اداروں اور اسپورٹس سینٹروں کے تعاون سے اس میراتھن کو منعقد کیا گیا ہے۔ اس بات کی جانکاری کریا شیل گلئیر سنگھاکے صدر دیپک نائک نے دی۔
پریس کانفرنس میں جانکاری دیتےہوئے انہوں نے بتایا کہ بھٹکل کی تاریخ میں پہلی مرتبہ میراتھن کا انعقاد ہورہاہے، عوام کے درمیان کینسر کے متعلق بیداری پیدا کرنے اور معلومات بہم پہنچانے کا مقصد لےکر یہ پروگرام ہورہاہے۔ کینسر کے متعلق ماہر ڈاکٹرس معلومات فراہم کریں گے۔میراتھن یلووڑی کوؤور پنچایت کے پی یوکالج میدان سے شروع ہوکر سرپن کٹا، پرورگا ، جوسف چرچ سے ہوتے ہوئے کاسمڑی مندر ،چوتھنی روڈ ، پھول بازار، ماری گوڑی مندر روڈ،اولڈ بس اسٹائنڈ ، مین روڈ، پی ایل ڈی بینک ، شمس الدین سرکل سے گزرتے ہوئے پولس میدان پہنچے گا۔ انہوں نے عوام الناس سے درخواست کی کہ 5فروری کی صبح 30-05بجے پی یوکالج میدان میں جمع ہو جائیں۔ میراتھن 5.5کلومیٹر کافاصلہ طئے کرےگا۔ جس کو عمر کے لحاظ سے چار زمروں میں تقسیم کیا جائے گا۔
5سے 15سال کی عمر والوں کے لئے 1.5کلومیٹر۔ 16سے 35سال کی عمروالوں کے لئے 5.5کلومیٹر ، 36سے 50سال کی عمروالوں کے لئے 5.5کلومیٹر اور 50سے زائد عمروالوں کے لئے 1.5کلومیٹر کا میاراتھان ہوگا۔ چاروں زمروں میں جیت حاصل کرنےوالے 12افراد کو پہلا، دوسرا اور تیسرا انعام مع ٹروفی اور ای۔ سرٹی فیکٹ دی جائے گی۔ میراتھن میں شریک ہونےوالوں کے لئےلازمی ہے کہ وہ اپنی عمر کی تصدیق کے لئے آدھارکارڈ یا اپنا شناختی کارڈ ساتھ لائیں۔ میراتھن میں حصہ لینے والے ہر فرد کو ای۔ سرٹی فیکٹ دی جائے گی ۔ منتظمین نے بتایا کہ500سے زائد افراد میراتھن میں شریک ہوسکتےہیں اور توقع ہے کہ ان میں زیادہ تر کالج طلبا شریک ہوں گے۔ میراتھن کےلئے رجسٹریشن کی آخری تاریخ 31جنوری 2023ہے۔ رجسٹریشن کے لئے ذیل کے افرادسے رابطہ کیاجاسکتاہے۔
پانڈورنگانائک-9141629861،من موہن نائک -9980431987، رمیش کھاروی-9590923664، شری کانت نائک -77609012112۔ اس کے علاوہ بندرروڈ پر واقع ویسٹرن منی ایکسینج دفتر میں بھی رجسٹریشن کرواسکتےہیں۔ پریس کانفرنس میں جے سی آئی کے رمیش کھاروی، کریاشیل سنگھا کے پانڈونائک، ونایک نائک، کُدرے بیرپا یوک سنگھا کے ارون نائک، اسپندنا چارٹیبل ٹرسٹ کے بھوانی شنکر نائک وغیرہ موجود تھے۔