بھٹکل : بارش کی تباہی کا سروے کرنے کے لئے 11 ٹیمیں تشکیل
بھٹکل،6؍اگست (ایس او نیوز) ایڈیشنل ڈپٹی کمشنر راجو موگویرا نے بتایا کہ بھٹکل تعلقہ میں زبردست برسات کی وجہ سے ہوئی تباہ کاریوں کا جائزہ لینے کے لئے انتظامیہ کی طرف سے 11 ٹیمیں تشکیل دی گئی ہیں جو متاثرین کے گھر گھر جا کر نقصانات کا جائزہ لے رہی ہیں۔
بھٹکل اسسٹنٹ کمشنر ممتا دیوی کے دفتر میں منعقدہ پریس کانفرنس کے دوران تفصیلات بتاتے ہوئے کہا کہ سروے ٹیم برسات اور سیلاب سے گھروں کو پہنچنے والے نقصان کے علاوہ گھروں کے اندر پانی گھسنے سے غذائی اجناس ، کپڑوں اور دیگر ساز وسامان، مویشی ، فصل ، دکانوں کے مال و اسباب وغیرہ کو پہنچے نقصان کا جائزہ لینے کا کام کر رہی ہے ۔ گھروں میں پانی گھسنے کی بات ثابت کرنے کے لئے کسی قسم کے دستاویزی ثبوت پیش کرنا ضروری نہیں ہے ۔ ایک علاقے میں پانی گھسنے کا مطلب یہ ہے کہ وہاں پر موجود تمام گھروں میں پانی گھس چکا ہے۔
انہوں نے کہا کہ گھروں میں پانی گھسنے سے ہونے والے نقصان کے لئے فی الوقت 10ہزار روپے معاوضہ دینے کی گنجائش ہے ۔ اس کے علاوہ گھروں ساز و سامان اور مشینوں کے نقصان کا معاوضہ دینے کے لئے وزیر اعلیٰ کی جانب سے خصوصی حکم آنا ضروری ہے۔
ماہی گیر کشتیوں ، جال وغیرہ کا مکمل نقصان ہونے پر فی الحال 9600 روپے اور جزوی نقصان ہونے پر 4600 روپے معاوضہ دینے کی گنجائش ہے ۔ ماہی گیر جال کا نقصان ہونے پر 2600 روپے معاوضہ دینے کی اجازت ہے ۔ محکمہ ماہی گیری کی جانب سے بہت زیادہ ادا کرنے کی گنجائش موجود ہے ۔ وزیر اعلیٰ کی جانب سے بھاری معاوضہ دینے کا اعلان ہونے کے بعد ادائیگی شروع ہوجائے گی۔