ٹریفک سے بد حال بنگلوروکو میٹرو سے بڑی راحت
بنگلورو،19؍جون(ایس او نیوز) شہر کے راستوں کی بدحالی اور ہر جگہ ٹریفک کے اژدھام نے شہریوں کو بے بس کر رکھا ہے اور عام عوام متبادل نظام نقل و حمل کی جستجومیں لگے ہوئے ہیں اسی لئے میٹرو ریل کی خدمات روز بروز عوام میں مقبولیت حاصل کرتی جا رہی ہے- شہر کے حالیہ حالات اور راستوں کے گڑھوں اور ان کی وجہ سے پیش آئے حادثات نے بھی عوام کو اس بات کی طرف متوجہ کیا ہے کہ وہ میٹرو کی خدمات سے استفادہ کریں - دوسری طرف خود بی ایم آر سی ایل آخری میل کا رابطہ فراہم کرنے کے سلسلہ میں کئی اقدامات کر رہی ہے جس میں بی ایم ٹی سی کی جانب سے بھی اسے تعاون حاصل ہو رہا ہے تو بی بی ایم پی نے بھی میٹرو اسٹیشنوں کے اطراف سائیکل ٹریکس کی تعمیر اور راہداریوں کو چوڑا بنانے وغیرہ کے منصوبے تیار کئے ہیں -ان سب کی وجہ سے امید کی جا رہی ہے کہ میٹرو کی خدمات عوام کے لئے مزید پر کشش اور مفید بھی بن جائیں گی-لیکن المیہ یہ ہے کہ جہاں ترقی یافتہ ممالک میں پہلے شہروں کا بنیادی ڈھانچہ تیار کیا جاتا ہے اور اس کے بعد ان میں لوگوں کا بسیراہوتا ہے اور معاشرتی ڈھانچہ کی تیاری عمل میں آتی ہے،مگر ہندوستان میں بالخصوص بنگلور جیسے بڑھتے ہوئے شہر میں یہ عمل دوسرے رخ پر ہوتا ہے-انفرادی زمینات پر گھر، مکانات اور عمارتیں تعمیر ہوتی ہیں، پھر بڑے بڑے اپارٹمنٹ آتے ہیں جن کے اطراف معاشرتی ڈھانچہ تیار ہوتا ہے اور اس کے بعدآخر میں شہری زندگی کے بنیادی ڈھانچہ کی آمد ہوتی ہے،البتہ یہ صورت حال ہمیشہ اور ہر جگہ نہیں ہوتی-نما میٹرو کے سلسلہ میں خیال کیا جا رہا ہے، بلکہ شہری ماہرین کو اس کا یقین ہے کہ یہ شہر کی صورت حال کو تبدیل کر سکتا ہے،البتہ یہ اب بھی تکلیف دہ حد تک سست رفتار ی کے ساتھ آگے بڑھ رہا ہے-اگرچہ کہ یہ بات اس وقت سمجھ میں آنا مشکل ہے مگر یہ حقیقت ہے کہ جب میٹرو کا کام مکمل ہو جائے گا اور اس کے تینوں مرحلے کام کرنا شروع کر دیں گے تو یہ بنگلور شہر کے تمام حصوں کو نا قابل فہم حد تک رابطہ فراہم کر سکتا ہے اور اس کے بعدشہر کے اندر سفر کرنا بالکل آسان ہو جائے گا-