بنگلورو، 29؍جون (ایس او نیوز) ریاستی وزیر اعلیٰ بسوا راج بومئی نے بتایاکہ وزیراعظم نریندرمودی کی قابل قیادت میں ہندوستان میں G-20 چوٹی کانفرنس 2023 کا انعقاد کیا جارہا ہے جو دنیابھر میں ہندوستان کی مضبوط تصویرکی عکاسی ہے۔ یہاں وزیراعظم نریندر مودی کے بطور گجرات کے وزیراعلیٰ 12سال اور بطور وزیراعظم 8سال کی کارکردگیوں پر مشتمل کتاب (modi@20:dreamsmeetdelivery) کے اجراء کے پروگرام سے خطاب کرتے ہوئے بومئی نے اس خیال کا ظہارکیا۔

انہوں نے بتایاکہ 2023میں G-20چوٹی کانفرنس کو ہندوستان میں منعقد کیا جارہا ہے۔ دنیا کے 20 اہم ممالک کا اجلاس اس مرتبہ ملک میں چلایا جارہا ہے اور بنگلورو میں بھی9/اجلاس منعقد ہوں گے۔ انہوں نے کہاکہ ہر وقت شہریوں کے دل میں جگہ بنانا ہر ایک کے بس کی بات نہیں ہے لیکن وزیراعظم نریندر مودی نے 130کروڑ آبادوالے اس ملک کی ترقی کے لئے دن رات محنت کی اوران کی قائدانہ صلاحیت کی بدولت ملک کا نقشہ ہی بدل گیا۔ انہوں نے بتایاکہ مرکزی حکومت نے سیمی کنڈکٹر کی پیداوار کے لئے خصوصی پالیسی مرتب کرتے ہوئے 66ہزار کروڑ کا گرنٹ مختص کیا ہے اور ماحولیات کے تحفظ اور قابل تجدید توانائی کو فروغ دینے ایتنھال کی پیداوار کی جارہی ہے۔ انہوں نے بتایا کہ آبادی کے بے تحاشہ اضافہ کو ہندوستان کی ترقی میں رکاوٹ مانا جاتا رہا ہے لیکن مودینے اپنی اسکیموں کے ذریعہ 26فیصد نوجوانوں کو ملک کی طاقت بنادیا اور پوری دنیا میں ہندوستان کو پہلا مقام دلانے کی مسلسل کوشش میں ہیں۔

بومئی نے بتایاکہ اس کتاب میں وزیراعظم مودی کے خیالات کو پیش کیاگیا ہے اور اس میں سدھامورتی، ڈاکٹر دیوی شٹی، پی وی سندھو ودیگرنے اپنے خیالات کا اظہارکیا ہے اس کتاب کا کنڑا میں ترجمہ کرکے ریاست کے عوام کو پیش کیا جائے گا۔