بنگلورو، 22/مئی (ایس او نیوز/ایجنسی) کرناٹک کی راجدھانی بنگلورو میں ہوئے حادثہ کے بعد ریاستی حکومت نے سبھی اَنڈر پاسوں کی بناوٹ کی جانچ کا حکم صادر کر دیا ہے۔ دراصل اتوار کو ہوئی شدید بارش کے بعد شہر میں جگہ جگہ پانی بھر گیا تھا۔ اس درمیان شہر کے ’کے آر سرکل‘ اَنڈر پاس میں بھرے پانی میں کار پھنسنے کے بعد انفوسس کی خاتون ملازم کی ڈوبنے سے موت ہو گئی۔ اس واقعہ کے بعد حکومت نے سبھی اَنڈر پاس کی موجودہ حالت پتہ کرنے کا فیصلہ لیا ہے۔

کرناٹک کے نائب وزیر اعلیٰ ڈی کے شیوکمار کا کہنا ہے کہ ’’ہم نے ایک تکنیکی ماہر کی موت کے بعد بنگلورو میں 18 اَنڈر پاس سمیت ریاست کے سبھی اَنڈر پاسوں پر رپورٹ دینے کا حکم دیا ہے۔ سب کچھ ایک دن میں نہیں ہوگا، لیکن یہ یقینی بنائیں گے کہ ایسا حادثہ دوبارہ نہ ہو۔ اپنے شہریوں کی زندگی کی حفاظت کرنا ہماری ذمہ داری ہے۔‘‘

واضح رہے کہ اتوار کے روز پیش آئے حادثہ پر ریاستی حکومت نے شدید افسوس کا اظہار کیا تھا۔ واقعہ کی جانکاری ملنے کے فوراً بعد وزیر اعلیٰ سدارمیا متاثرہ کنبہ کا حال چال لینے اسپتال پہنچے۔ انھوں نے حالات کا جائزہ لیا اور اہل خانہ کے اراکین سے ملاقات کر ہمدردی ظاہر کی۔ انھوں نے بھانوریکھا (مہلوکہ) کے گھر والوں کو 5 لاکھ روپے معاوضہ دینے اور اسپتال میں داخل لوگوں کو مفت علاج دینے کا بھی اعلان کیا۔

سدارمیا نے اس واقعہ کے تعلق سے کہا کہ آندھرا پردیش کے وجئے واڑا کے رہنے والے خاندان نے کار کرایہ پر لی تھی اور بنگلورو گھومنے آئے تھے۔ شدید بارش کے سبب کے آر سرکل اَنڈر پاس میں پانی بھر گیا تھا جس کو دیکھتے ہوئے بیریکیڈنگ کر دی گئی تھی۔ حیرانی والی بات یہ ہے کہ اس کے باوجود کیب ڈرائیور نے اُدھر سے ہی گاڑی نکالی جس کے سبب یہ حادثہ ہوا۔