بنگلورو،18/ جنوری (ایس او نیوز) بنگلوروشہر میں آر ایس ایس کے ایک کارکن پر حملہ کے معاملہ میں پولیس نے 6/ملزمین کو گرفتار کیا ہے۔ جن کے بارے میں پولیس یہ دعویٰ کررہی ہے کہ یہ ایس ڈی پی آئی کے کارکن ہیں۔ حملہ کے ایک معاملہ میں ان نوجوانوں کی گرفتاری کی خبر کو میڈیا نے شام ہوتے ہوتے اتنی بڑی بنادی کہ اس معاملے کو دہشت گردی کی ایک بہت بڑی سازش سے جوڑدیا گیا۔ 

بنگلورو شہر کے پولیس کمشنر بھاسکر راؤ نے جمعہ کی صبح ایک اخباری کانفرنس سے خطاب کرتے ہوئے کہا کہ آر ٹی نگر کے ساکن ٹیلر عرفان، سیداکبر، سید صدیق اکبر، اکبر باشاہ، ثناء اللہ اور صادق کی شناخت ملزمین کی حیثیت سے کی گئی ہے۔ ان کی گرفتاری کا معاملہ یہ ہے کہ 22/ دسمبر 2019کو شہریت قانون کی تائید میں بی جے پی اور اس کہ ہمنوا تنظیموں کی طرف سے ٹاؤن ہال کے پاس کئے گئے مظاہرے میں شرکت کے بعد گھر لوٹتے وقت اور ورون نامی آر ایس ایس کارکن پر کمبار گنڈی روڈ پر کچھ شرپسندوں نے روک کر اس پر قاتلانہ حملہ کیا اور فرار ہوگئے۔ مقامی لوگوں کی مدد سے زخمی ورون کو اسپتال پہنچایا گیا۔اس حملے کے سلسلہ میں خلاصی پالیہ پولیس تھانے میں ایک کیس درج ہوا۔ کیس کی جانچ کے لئے ایک خصوصی ٹیم تشکیل دی گئی۔ تحقیق کے دوران یہ بات سامنے آئی کہ حملہ آوروں کا تعلق ایس ڈی پی آئی سے ہے۔ یہ بھی پتہ چلا کہ ان حملہ آوروں نے واقعے کے بعد اپنے کپڑے جلادئے۔ حملے کے لئے استعمال کئے گئے ہتھیارات نائس روڈ پر آنے والے انچے پالیہ تالاب میں پھینک دیئے اور اپنے ہیلمیٹ رام مورتی نگر کے قریب آنے والے ایک نالے میں پھینک دیئے۔ چپل اتار کر ہانسواڑ ی کی موری میں پھینک دیئے۔ پولیس نے ان ملزمین کی نقل و حرکت کا 800کیمروں کے ذریعہ جائزہ لینے کے بعد ان کو گرفتار کیا۔ ان کے خلاف انسداد غیر قانونی سرگرمی قانون (یو اے پی اے) کے تحت مقدمہ درج کیا گیا ہے۔ 

پولیس کمشنر نے دعویٰ کیا کہ ان ملزمین کے مطابق عوامی سطح پر گڑبڑ کرنے، فساد مچانے، بسوں پر پتھراؤ کرنے کے لئے ایس ڈی پی آئی کی طرف سے ماہانہ دس ہزار روپئے کی رقم ہر لڑکے کو دی جاتی۔ کمشنر نے یہ بھی بتایا کہ ملزمین نے پوچھ گچھ کے دوران بتایا کہ وہ ہندو رہنماؤں کے قتل کے ارادے سے 22/ دسمبر کو ٹاؤن ہال کے قریب پہنچے تھے لیکن سخت پولیس بندوبست کے سبب حملہ نہ ہوسکا جس کے بعد جاتے ہوئے ان کی ٹولی نے ورون کو نشانہ بنایا۔