بنگلورو،18/مئی(ایس او نیوز)  شہر میں جمعہ کی دوپہر ژالہ باری کے ساتھ ہوئی بارش اور تیز ہواؤں نے کئی علاقوں میں درخت اور بجلی کے کھمبے اور بڑی بڑی ہورڈنگوں کو اکھاڑ دیا۔ دوپہر میں ہوئی بارش سے جہاں درجہئ حرارت میں غیر معمولی کمی واقع ہوئی وہیں تیز ہواؤں کے سبب شہر کے کئی علاقوں میں بھاری درخت اکھڑ گئے۔ اس کی وجہ سے چند گاڑیوں کو نقصان بھی پہنچا ہے۔ میجسٹک، جئے نگر، بسونگڈی، ودھان سودھا، راجہ جی نگر، وجئے نگر، یلہنکا، اور دیگر علاقوں میں بارش کی وجہ سے کئی سڑکیں تالابوں میں تبدیل ہوگئیں۔ان سڑکوں سے پانی کو ہٹانے کے لئے ہنگامی طور پر بی بی ایم پی اور فائر فور س کی مدد لینی پڑی۔ محکمہئ موسمیات نے اگلے دو تین دنوں تک بارش کا یہ موسم جاری رہنے کی پیشین گوئی کی ہے۔