بنگلور 31/اگست (ایس او نیوز) تین خواتین بشمول  سات افراد اُس وقت ہلاک ہوگئے جب اُن کی تیز رفتار کار  فٹ پاتھ کے کھمبے سے  ٹکرانے کے بعد ایک بینک کی عمارت سے بھی ٹکراگئی۔ حادثہ کورمنگلا میں منگلا کلیان کے قریب منگل کی اولین ساعتوں میں ایک اور دو بجے کے درمیان پیش آیا۔

مرنے والوں میں ہوسور (تمل ناڈو) کے رکن اسمبلی اور ڈی ایم کے لیڈر وائی پرکاش کے فرزند کرونا ساگر (28) اور کرونا ساگر کی اہلیہ ڈاکٹر بندو بھی شامل ہیں۔دیگر مہلوکین کی شناخت  ڈاکٹر دھنوشا (21)، ایشیتا (21) ، اکشے گویل (23)، اُتسو اور روہت (23) کی حیثیت سے کی گئی ہے۔ 

حادثے کی نوعیت کا اندازہ اس بات سے لگایا جاسکتا ہے کہ موقع واردات پر ہی چھ لوگوں کی موت واقع ہوگئی، جبکہ ساتویں نے  اسپتال  لے جانے کے دوران دم توڑ دیا۔ بتایا گیا ہے کہ آوڈی کار پرایر بیگس بھی لگے ہوئے تھے، لیکن ٹکر لگنے کے بعد ائیر بیگ نہیں کھلے۔

عینی شاہدین نے بتایا کہ  انہوں نے کارکی ٹکر مارنے کی ایک بڑی آواز سنی تھی،  آواز سنتے ہی لوگ جائے وقوع پر پہنچے اور ایمبولنس سمیت پولس کو فون کرکے حادثے کی جانکاری دی۔  چار لوگ بے حس پڑے تھے، جبکہ گاڑی کے اندر پھنسے  لوگوں کو    باہر نکالنے کے لئے  قرییب بیس منٹ لگے۔

پولس ذرائع نے بتایا کہ  اکشے گویل کیرالا کا رہنے والا تھا، اُتسو کا تعلق ہریانہ سے تھا ، روہت ہبلی کا اور دیگر پانچ لوگ بنگلور کے ایک ہوسٹل میں رہائش پذیر تھے۔ مرنے والوں کی عمریں 20 اور 30 کے درمیان تھی۔

حادثے میں کارکے بہت بری طرح پرخچے اُڑ گئے ہیں، کار کے اندر خون بکھرا پڑا تھا جبکہ پچھلے پہیئے بھی گاڑی سے الگ ہوگئے تھے۔