مہنگائی اور قومی اثاثوں کے فروخت کے خلاف کانگریس کا راج بھون چلواحتجاج
بنگلورو، 9؍ستمبر (ایس او نیوز)اشیائے ضروری اور پٹرولیم کی قیمتوں میں اضافہ اور قوم کے اثاثے اور بنیادی ڈھانچے نجی اداروں کو فروخت کرنے کے خلاف کانگریسی نے آج شہر میں راج بھون چلو مارچ نکالا۔اس احتجاجی مظاہرہ کے دوران کانگریس کارکنوں نے وزیراعظم نریندر مودی اور ان کی قیادت والی مرکزی حکومت کے خلاف نعرے بلند کئے۔بنگلورو ڈسٹرکٹ کانگریس کمیٹی اور مہیلا کانگریس کی جانب سے نکالی گئی اس احتجاجی ریلی کی قیادت سابق وزیر وکانگریس کے رکن اسمبلی رام لنگا ریڈی نے کی۔ شہر کے ایم جی روڈ سے نکالے گئے اس احتجاجی مارچ کو راج بھون پہنچنے سے پہلے ہی پولیس نے موریا سرکل پر ہی روک کر مظاہرین کو حراست میں لے لیا۔کچھ دیر بعد رہا بھی کردیا۔پٹرول،ڈیزل، رسوئی گیس اور دیگر اشیائے ضروری کی قیمتوں میں مسلسل اضافہ اور سرکاری اداروں کی نجکاری میں مسلسل اضافہ اور سرکاری اداروں کی نجکاری کے خلاف مظاہرین نے نریندر مودی اوران کی حکومت کے خلاف نعرے بازی کی۔اس موقع پر رام لنگاریڈی نے کہا کہ مرکزی بی جے پی حکومت کو مہنگائی کی فکر نہیں بلکہ وہ6.25لاکھ کروڑ کے عوامی ادارے اور بنیادی ڈھانچے جس کو پچھلی حکومتوں نے تعمیر کیا تھا، مودی حکومت ان عوامی، اثاثوں کو فروخت کرنے میں مصروف ہے۔انہوں نے کہا کہ کانگریس اس ناانصافی کے خلاف عوام کی آواز بن کر احتجاج کرے گی اور عام آدمی کو انصاف ملنے تک کانگریس کا احتجاج جاری رہے گا۔اس احتجاج میں سابق وزراء کے جے جارج، کرشنا بائرے گوڈا، رکن اسمبلی رضوان ارشد، اراکین کونسل یو بی وینکٹیش، نارائن سوامی نے بھی شرکت کی اور مظاہرین سے خطاب بھی کیا۔ اس احتجاج کے بعد کانگریس کے چند منتخب نمائندوں نے راج بھون میں ریاستی گورنر سے ملاقات کرکے انہیں عرضداشت پیش کرتے ہوئے اس عرضداشت کو صدر ہند کو روانہ کرنے کی درخواست کی۔