بنگلورو : پروین کمار قتل کی مذمت کرتے ہوئے اے بی وی پی نے کیا ہوم منسٹر کی رہائش گاہ کا گھیراو - پولیس نے کیا لاٹھی چارج
بنگلورو31/ جولائی (ایس او نیوز) بی جے پی یووا مورچہ لیڈر پروین کمار نیٹارو قتل کے خلاف احتجاج درج کروانے کے لئے بی جے پی کی طلبہ تنظیم اکھل بھارتیہ ودیارتھی پریشد نے جئے محل میں واقع ریاستی وزیر داخلہ جیانیندرا آرگا کی سرکاری رہائش گاہ کا گھیراو کیا اور داخلی دروازے پر دھرنا دیتے ہوئے ریاستی حکومت کے خلاف نعرے بازی کی ۔
موصولہ رپورٹ کے مطابق پولیس نے مداخلت کرتے ہوئے اے بی وی پی کے احتجاجی مظاہرین کو وزیر داخلہ کی رہائش گاہ سے باہر نکال کر منتشر کرنے کی کوشش کی تو پولیس اور مظاہرین کے درمیان کشمکش شروع ہوئی ۔ مظاہرین نے ایس ڈی پی آئی اور پی ایف آئی پر پابندی لگانے ، ہندو کارکنان کو ضروری تحفظ فراہم کرنے اور وزیر داخلہ کے استعفیٰ کا مطالبہ کرتے ہوئے نعرے بازی کی ۔
حالات کو بگڑتے دیکھ کر پولیس نے لاٹھی چارج کیا اور مظاہرین کو منتشر کر دیا ۔ اس دوران 40 سے زائد کارکنان کو حراست میں لے کر پولیس اسٹیشن لے جایا گیا ۔
پیشگی اطلاع نہیں تھی : پولیس کمشنر پرتاپ ریڈی نے کہا کہ اے بی وی پی کی طرف سے احتجاجی مظاہرے اور وزیر داخلہ کے گھر میں گھسنے کے پلان کی کوئی پیشگی اطلاع نہیں تھی ۔ ایسے واقعات کو برداشت کرنے کا سوال نہیں ہے ۔ ہمارے محکمہ کو اس تعلق سے پیشگی اطلاعات حاصل ہونی چاہیے تھیں ۔ لیکن یہ ہم سے نہیں ہو سکا ۔ اس معاملے کا جائزہ لیا جائے گا ۔
پی ایس آئی سمیت دو پولیس اہلکار معطل : وزیر داخلہ کی رہائش گاہ میں اے بی وی پی کارکنان گھسنے کی جو واردات ہوئی ہے اسے وزیر داخلہ کی سیکیوریٹی میں چوک اور فوری اقدام کرنے میں ناکامی قرار دیتے ہوئے جے سی نگر پولیس اسٹیشن کے پی ایس آئی راجے صاب اور ہیڈ کانسٹیبل شرینواس مورتی کو معطل کیا گیا ہے ۔ ڈی سی پی نارتھ ونئے کمار کے ذریعے کی گئی ابتدائی تفتیش کے بعد ان دونوں پولیس والوں کو معطل کرنے کا حکم جاری کیا گیا ۔ معلوم ہوا ہے کہ جے سی نگر انسپکٹر کا تبادلہ ہوگیا ہے اور وہ منصب ابھی خالی پڑا ہے ۔ اس پس منظر میں پی ایس آئی راجے صاب کو ایس ایچ او کی عبوری ذمہ داری دی گئی تھی ۔