بی بی ایم پی کورونا ٹسٹ ٹیموں میں میڈیکل طلباء کی شمولیت، طبی خدمات کیلئے طلباء کو ماہانہ19 ہزارمشاہرہ دیا جائے گا
بنگلورو،4؍اگست (ایس او نیوز) بروہت بنگلور مہا نگر پالیکے (بی بی ایم پی) نے شہر میں روزانہ 50ہزار افراد کے کورونا ٹسٹ کا ہدف مقرر کیا ہے۔ اس سلسلہ میں بی بی ایم پی کی طرف سے خصوصی ٹیمیں تشکیل دی جارہی ہیں۔ شہر میں طبی اور نیم طبی عملہ کی قلت کی وجہ سے ٹیموں کی تشکیل میں دشواریاں پیش آرہی ہیں۔اس کے پیش نظر بی بی ایم پی نے راجیو گاندھی یونیورسٹی آف ہیلتھ سائنس اور محکمہ اعلیٰ تعلیم سے طلباء کی خدمات فراہم کرنے کی گزارش کی ہے۔ بتایا جاتا ہے کہ بی بی ایم پی نے راجیو گاندھی یونیورسٹی اور اس سے ملحق کالجوں کے 994پیرا میڈیکل طلباء کے علاوہ محکمہ اعلیٰ تعلیم کے ماتحت کالجوں کے 460سائنس طلباء کی نشاندہی کی ہے۔ بی بی ایم پی ان طلباء کو کورونا ٹسٹ ٹیموں میں شامل کرنا چاہتا ہے۔ بتایا جاتا ہے کہ کالجوں کے 46طلباء میں سے 150طلباء کورونا ٹسٹ ٹیم میں شامل ہونے کے لئے تیار ہیں۔ بی بی ایم پی نے پیر کے روز ان طلباء کی ٹریننگ کا سلسلہ بھی شروع کردیا ہے۔ طلباء کو ان کی خدمات کے لئے ماہانہ 19ہزار روپئے مشاہر دیا جائے گا۔بی بی ایم پی کمشنر منجوناتھ نے بتایا کہ ان طلباء کو کورونا ٹسٹ کے لئے لوگوں سے سواب کے نمونے حاصل کرنے کی تربیت دی جائے گی۔ اس کے بعد طلباء کو رونا ٹسٹ ٹیموں میں شامل کیا جائے گا۔ محکمہ اعلیٰ تعلیم کے ایڈیشنل چیف سکریٹری رمنا ریڈی نے بتایا کہ محکمہ نے کورونا ٹسٹ ٹیم میں شامل ہونے کے لئے رضا مند طلباء کی فہرست تیار کی ہے۔ یہ فہرست بی بی ایم پی کو سونپی گئی ہے۔ انہوں نے بتایا کہ بیشتر کالجوں کے نیشنل سرویس اسکیم (این ایس ایس) سے جڑے طلباء نے بھی کورونا ٹسٹ میں شامل ہونے کے لئے دلچسپی دکھائی ہے۔ اس سلسلہ میں بی بی ایم پی سے بات چیت کے بعد ان طلباء کو کورونا ٹسٹ ٹیم میں شامل ہونے کے لئے تربیت دی جائے گی۔ دریں اثناء بی بی ایم پی کمشنر منجوناتھ نے ایک سرکیولر جاری کرتے ہوئے راجیو گاندھی یونیورسٹی کو کورونا ٹسٹ کے لئے طلباء کی خدمات فراہم کرنے کی ہدایت دی ہے۔ بتایا جاتا ہے کہ بی بی ایم پی نے کرناٹک میں وبائی امراض کی روک تھام کے قانون 2020کے تحت راجیو گاندھی یونیورسٹی کو کورونا ٹسٹ کے لئے طلباء کی خدمات فراہم کرنے کی ہدایت دی ہے۔ یونیورسٹی کے طلباء کو 3/ اگست تک بی بی ایم پی دفاتر میں رپورٹ کرنے کے لئے کہا گیا ہے۔یونیورسٹی کے وائس چانسلر سچدانند نے بتایا کہ یونیورسٹی کی طرف سے بھی طلباء کو بی بی ایم پی کی کورونا ٹسٹ ٹیم میں شامل ہونے کی ہدایت دی ہے۔