بھٹکل ،25؍ستمبر (ایس او نیوز) کرناٹکا ودھان سودھا میں اسپیکر وشویشورا ہیگڈے کاگیری اور ضلع شمالی کینرا انچارج وزیر شیورام ہیبار کی موجودگی میں کمٹہ، ہلیال اور بھٹکل کے اراکین اسمبلی نے وزیرتوانائی سنیل کمار سے ملاقات کی اور کاروار، انکولہ سرسی، ہوناوراور بھٹکل جیسے مقامات بجلی سربراہی سے متعلق مسائل پر گفتگو کی ۔
سرسی میں نئے بجلی سپلائی مرکز کے قیام اور 33 کے وی ریفرنس وغیرہ کے سلسلے میں بات چیت کی گئی ۔ وزیر موصوف کو بتایا گیا کہ کاروار کی دن بہ دن بڑھتی ہوئی آبادی کی وجہ سے وہاں بجلی کی مانگ میں اضافہ ہوگیا ہے اس لئے کاروار میں ایک ذیلی مرکز قائم کرنے کے علاوہ دیہی علاقوں میں بجلی فراہمی میں درپیش رکاوٹوں کو دور کرنے کے لئے چنڈیا میں ایک بجلی فراہمی کا ایک سب اسٹیشن قائم کرنا ضروری ہے ۔ چیتاکول میں سب اسٹیشن قائم کرنے کے لئے زمین کا مسئلہ کا پیدا ہوگیا ہے جسے حل کرنا ضروری ہے ۔ انکولہ تعلقہ کے ماستی کٹے میں برانچ آفیسر کا دفتر قائم کرنے ، کاروار اور انکولہ میں گیانگ مین ، لائن مین اور دیگر اسٹاف کی کمی دور کرنے کی بھی مانگ رکھی گئی ۔ کدرا منصوبہ کے تحت بے گھر ہونے والے 70 خاندانوں کے لئے مکان فراہم کرنے کا مطالبہ پیش کیا گیا ۔
اسی طرح بھٹکل سے متعلق بجلی کے مسائل کو ایم ایل اے سنیل نائک نے وزیر توانائی کے سامنے رکھا ۔ انہوں نے بتایا کہ کمٹہ کے 110kv گرڈ کی چونکہ سنگل سرکیوٹ لائن ہوناور کی طرف آتی ہے اس لئے راستے میں کہیں بھی مسئلہ پیدا ہوتو پورے ہوناور بھٹکل تعلقہ کی بجلی لائن کٹ جاتی ہے ۔ بھٹکل تعلقہ میں 110/33/11 کے وی کا سب اسٹیشن قائم کرنے کے لئے 2019 میں منظوری مل گئی ہے ، محکمہ جنگلات سے بھی گرین سگنل مل چکا ہے اس لئے جلد از جلد اس کی تعمیر ہونی چاہیے ۔ اور اس کا مرکز کا لنک بیندور سے سب اسٹیشن سے کردینا چاہیے ۔
اس کے علاوہ ضلع سے متعلقہ دیگر مسائل اور ان کے حل پر بھی گفتگو کی گئی ۔ وزیرتوانائی نے ان تمام مسائل کو وزیراعلیٰ کے علم میں لانے اور ان کے حل کے لئے مناسب اقدامات کرنے کا بھروسہ دلایا ۔