بنگلورو، 7؍دسمبر(ایس او  نیوز)بنگلورو کے آنیکل تعلقہ میں کووڈ کے نئے معا ملات درج ہو نے سے مقامی لوگوں میں دہشت کا ماحول پایا جا رہا ہے۔ وہاں کے ایک اسکول اور نرسنگ کالج کے12طلبہ سمیت جملہ27افراد کو کووڈ کی تصدیق ہو ئی ہے۔اس کے علاوہ کمپنی کے ایک اجلاس میں شرکت کرنے والے3افراد کووڈ پازیٹیو پائے گئے ہیں،لیکن اس سلسلہ میں تعلقہ انتظامیہ اور محکمہ  صحت کے افسران نے کو ئی جانکاری نہیں دی ہے۔

تعلقہ کے دھرمیندرا کے دا انٹر نیشنل اسکول کے ہاسٹل میں مقیم طلبہ کی آر ٹی پی سی آر رپورٹ موصول ہوئی ہے۔اس کے علاوہ مرو سور کے سواتی نرسنگ کالج کے7طلبہ میں بھی کووڈ کی علامات پائے گئے ہیں۔تعلقہ میں کووڈ کے مزید معا ملات درج نہ ہو اس کے لئے تعلقہ انتظامیہ نے درکار اقدامات کئے ہیں۔کووڈ علامات پائے گئے طلبہ کو آنیکل کے کووڈ کئیر سنٹر میں داخل کیا گیا ہے۔

اس سلسلہ میں تعلقہ کے میڈیکل افسر ونئے نے بتا یا کہ طلبہ کے علاوہ دیگر15افراد کو مختلف پرائمری ہیلتھ سنٹرز میں بھرتی کیا گیا ہے جہاں ان کا علاج جاری ہے۔جنوبی افریقہ کے ایک باشندہ کو کووڈ پازیٹیو ہوا تھا،جس نے آنیکل تعلقہ کے بھمسندرا میں موجود ایک نجی کمپنی میں منعقد اجلاس میں شرکت کی تھی۔بتا یا جا تا ہے کہ اس اجلاس میں شرکت کر چکے مزید تین افراد کو کووڈ کی تصدیق ہونے کی بات سامنے آئی ہے۔