بنگلورو،14؍نومبر(ایس او  نیوز) کیمپے گوڈا انٹر نیشنل ایر پورٹ ٹرمنل2-میں دسمبر سے مسافروں کے لئے پروازوں کا آغاز ہوگا جس کے تحت پہلے ڈمیسٹک(دیسی) پرواز شروع ہوں گے اور جنوری میں بین الا قوامی پروازوں کا آغاز ہوگا۔ مسافروں کی بھیڑ کم کرنے کے مقصد کے تحت ایر پورٹ کے ٹرمنل۔1سے متصل تعمیر ٹرمنل۔2کا افتتاح 11نومبر کو وزیر اعظم نریندر مودی نے کیا تھا،اور اب بنگلور انٹر نیشنل ایر پورٹ لمیٹڈ(بی آئی اے ایل) نے دسمبر کے پہلے ہفتہ سے دیسی پرواز شروع کرنے کا فیصلہ کیا ہے۔

بتا یا جا تا ہے کہ پرانے ٹرمنل کی طرز پر ڈمیسٹک(دیسی)،بین الا قوامی پرواز بھی دستیاب رہے گی۔پہلے مرحلہ میں دیسی پرواز اور بعد میں سہولت کے مطابق جنوری سے بین الا قوامی پروازوں کا آغاز ہوگا۔ بی آئی اے ایل کے مینیجنگ ڈائرکٹر ہری مرار نے بتا یا کہ گزشتہ14سال سے بنگلور ایر پورٹ جنوبی ہند کا باب الداخلہ بنا ہوا ہے،اور ٹرمنل۔2کے ذریعہ مزید فضائی خدمات فراہم کرنے کا نشانہ مقرر کیا گیا ہے۔ بنگلور انٹر نیشنل ایر پورٹ ملک میں تیسرا سب سے زیادہ مسافروں سے بھرا ایر پورٹ ہے،کورونا سے قبل سالانہ 3.3کروڑ مسافروں نے سفر کیا تھا اور یہاں سے76دیسی اور25غیر ملکی ایر پورٹس کیلئے فضا ئی سرویس مو جود ہے۔ انہوں نے بتا یا کہ28فرانچائز خدمات انجام دے رہے ہیں۔انہوں نے بتا یا کہ فی الوقت ٹرمنل۔1 کے مقابلے ٹرمنل۔2زیادہ مسافروں کی گنجائش والا ہے،جہاں سے اورزیادہ فضائی سرویس کی توقع ہے۔