بنگلورو،28؍اکتوبر(ایس او نیوز) شہربنگلورومیں کوروناوائرس سے متاثرہونے والوں کے معاملات میں بتدریج کمی آرہی ہے مگرماسک نہ پہننے اورسماجی دوری اختیارنہ کرتے ہوئے کوروناضابطہ کی خلاف ورزی کرنے والوں کی تعدادمیں کوئی کمی نہیں آرہی ہے۔

بروہت بنگلورو مہانگرپالیکے (بی بی ایم پی)کے تمام آٹھوں زونوں میں ماسک نہ پہن کرکووڈضابطہ کی خلاف ورزی کرنے سے متعلق 1,59,448 معاملات درج ہوئے ہیں۔ماسک نہ پہن کرکووڈضابطہ کی خلاف ورزی کرنے والوں پر بی بی ایم پی مارشل 200روپئے جرمانہ عائدکررہی ہے۔اس طرح مارشل نے 26ستمبرتک ماسک نہ پہننے کی پاداش میں جملہ 3.5کروڑروپے جرمانہ وصول کیاگیا ہے۔جب سے ماسک نہ پہننے والوں پرجرمانہ کا سلسلہ شروع کیاگیا، تب سے اب تک جملہ 3,53,40,819روپئے جرمانہ وصول کیاگیا ہے۔ اس کے علاوہ سماجی فاصلہ کاخیال نہ رکھنے والے18ہزار 239/افرادسے 39,19.916 روپئے (39.19لاکھ) جرمانہ وصول کیاگیاہے۔ ماسک نہ پہننے اور سماجی فاصلہ کی خلاف ورزی کرنے والوں کے جملہ معاملات میں 1,77,687تک اضافہ ہواہے اورجرمانہ وصولی کی شرح 3.92 (3,92,60,735)کروڑروپئے تک جاپہنچی ہے۔اس میں جرمانہ کی وہ رقم بھی شامل ہے جب سختی کرتے ہوئے جرمانہ کی رقم 1000روپئے کی گئی تھی۔