بیلتنگڈی، 25؍ستمبر (ایس او نیوز) مندروں کو منہدم کرنے کی ریاستی  پالیسی کے خلاف احتجاجی مظاہرے سے خطاب کرتے ہوئے سابق ایم ایل اے اور کانگریسی لیڈر وسنت بنگیرا نے الزام لگایا کہ حکومت کی طرف سے  ریاست میں غیر معلنہ ایمرجنسی نافذ کی گئی ہے جس کے چلتے احتجاجی مظاہرے منعقد کرنے میں رکاوٹ پیدا کی جارہی ہے ۔

وسنت بنگیرا نے کہا کہ عوام کی ناراضی سے گھبرائی ہوئی حکومت کی طرف سے مظاہرے کے لئے مائک استعمال کرنے کی اجازت دینے سے انکار کردیا ۔ لیکن اس عوام دشمن حکومت کے خلاف مسلسل احتجاج جاری رہے گا ۔ انہوں نے کہا کہ اس سے قبل لائیل وینکٹرمنا مندر اور کنیاڈی شری رام کشیترا کے معاملہ میں بھی بی جے پی والوں نے مخالفانہ سیاست کی تھی ۔ اس وقت میں نے ہی ڈٹ کر مقابلہ کیا تھا اور ان مندروں کو بچایا تھا ۔ اب بھی تعلقہ کے کسی بھی مندر کو چھونے کی کوشش کی جائے گی تو اسے روکنے کے لئے  میں آگے بڑھوں گا۔

بلاک کانگریس صدر رنجن جی گوڈا اور شئیلیش کمار کی قیادت میں منعقدہ اس مظاہرے میں کانگریسی لیڈران اور کارکنان نے لائیل وینکٹرمنا مندر سے سنتے کٹَے آئیپا گوڈی تک جلوس نکالا جس میں حکومت کے خلاف نعرے بازی کی گئی ۔ مظاہرین نے کانگریس پارٹی کے جھنڈوں کے ساتھ زعفرانی جھنڈے بھی اٹھا رکھے تھے ۔ اس موقع پر سابق وزیر گنگا دھر گوڈا نے بھی مظاہرین سے خطاب کیا ۔