مینگلور کے قریب بیلتنگڈی میں بے قابو آٹو رکشہ ندی میں گر گیا - ایک خاتون فوت - ڈرائیور سمیت دیگر تین افراد زخمی
بیلتنگڈی ،5 / فروری (ایس او نیوز) مسافروں کو لے جا رہا آٹو رکشہ بے قابو ہوکر ندی میں گرنے سے صفیہ (57 سال) نامی خاتون فوت ہوگئیں اور مریمّا (23 سال) اور محمد اشرف (35 سال) نامی دیگر 2 مسافروں کے علاوہ آٹو ڈرائیور ابوبکر صدیق (21 سال) زخمی ہوگئے ۔
معلوم ہوا ہے کہ حادثہ اس وقت پیش آیا جب کھاجور میں عرس کی تقریب میں شرکت کے بعد صفیہ کے گھر والے واپس لوٹ رہے تھے ۔ کاپ چڑاو کے پاس رکشہ ڈرائیور کے ہاتھ سے بے قابو ہوگیا اور مورتیونجیا ندی میں جا گرا ۔ صفیہ رکشہ کے ساتھ ندی میں غرقاب ہوگئی جبکہ زخمی ہونے والے افراد رکشہ سے پھسل کر ندی کے پاس کھائی میں سوکھی زمین پر گر گئے تھے ۔
مقامی لوگوں نے حادثہ کے بعد ندی میں اتر کر صفیہ کی لاش باہر نکالی اور کھائی میں موجود زخمیوں کو اوپر لانے کے بعد علاج کے لئے اسپتال میں منتقل کرنے کا انتظام کیا ۔
عینی شاہدین کا کہنا ہے کہ موتیونجیا ندی کے اس مقام پر گزشتہ ایک مہینے میں یہ تیسرا بڑا حادثہ ہے ، کیونکہ یہاں ندی کنارے پرکوئی رکاوٹ یا دیوار نہیں بنی ہے اس لئے یہاں اکثر حادثے ہوتے رہتے ہیں ۔ اب اس حادثے کے فوری بعد وہاں رکاوٹی دیوار کے طور پر مٹی کے گولے بنا کر ندی کے کنارے رکھوائے گئے ۔
اس ضمن میں بیلتنگڈی پولیس اسٹیشن میں کیس درج کیا گیا ہے ۔