منگلورو،25؍اگست (ایس او نیوز) کانگریس پارٹی کے اراکین نے بی جے پی رکن اسمبلی ہریش پونجا کے دفترکے سامنے احتجاجی مظاہرا اور گھیراؤ کرتے ہوئے ’سیلاب راحت کاری فنڈ کے تحت جمع اور خرچ کی گئی رقم کا حساب و کتاب طلب کیا۔

اس گھیراؤ کی قیادت سابق کانگریسی رکن اسمبلی وسنت بنگیرانے قیادت کی۔اس دوران وسنت بنگیرااور دیگر مظاہرین اورپولیس کے درمیان زبانی تکرار بھی ہوئی اور تھوڑی سی دھکم پیل بھی ہوئی۔پولیس نے بڑی مشقت سے مظاہرین کو ایم ایل اے دفتر کے گیٹ پر ہی روک لیاجہاں مظاہرین دھرنے پر بیٹھ گئے۔مظاہرین میں سے اکثر نے چہرے پر ماسک نہیں پہنا تھااور آپس میں سماجی فاصلہ بھی نہیں رکھا تھا۔ 

اس موقع پر خطاب کرتے ہوئے وسنت بنگیرا نے کہا کہ ریاست میں بی جے پی حکومت کورونا کے علاج کے سلسلے میں سرکاری خزانہ لوٹ رہی ہے جبکہ مرکز میں پی ایم کیئر فنڈ کے نام پر عوام کو دھوکہ دیا جارہا ہے۔یہاں سیلاب زدگان کی امداد کے لئے جمع کی گئی اشیاء اور رقم کا انجام کیا ہوا اس کا پتہ نہیں چل رہا ہے۔اس کا حساب ایم ایل اے کو دینا ہوگا۔

انہوں نے کہا کہ سیلاب زدگان کی امداد کے لئے دی گئی اشیاء فروخت کرکے پیسے بنائے جارہے ہیں۔ وزیر اعلیٰ نے سیلاب زدگان کو ہر قسم کی امداد فراہم کرنے کی ہدایت دے رکھی ہے، لیکن یہاں پر سیلاب سے تباہ ہونے والوں کو پانچ مکانات تعمیر کرکے دینا ابھی تک ممکن نہیں ہوسکا ہے۔اس سے پتہ چلتا ہے کہ ایم ایل اے کو سیلاب زدگان کی کتنی فکر ہے

مظاہرین نے ایم ایل اے کو وارننگ دیتے ہوئے کہا کہ اگر پندرہ دنوں کے اندر سیلاب راحت کاری فنڈ کا حساب عوام کے سامنے پیش نہیں کیاگیاتو پھر زبردست احتجاجی مظاہرا منعقد کیا جائے گا۔