بیلگام: ریاستی حکومت عوام کے سلگتے مسائل پر بحث کرنےکے بجائے عوام کوبے وقوف بنانےکے لئےتصاویر کا مسئلہ اٹھارہی ہے: سدرامیا کا الزام
بیلگام :19؍ دسمبر(ایس اؤ نیوز ) بیلگام کے سورنا ودھان سودھا ہال میں ریاستی حکومت کی جانب سے ساورکر کی تصویر نصب کئےجانےکی مخالفت کرتےہوئے کانگریس پارٹی کی جانب سے کانگریس کے ارکان اسمبلی اور ارکان پریشد ودھان سودھا کی سیڑھیوں پر بیٹھ کر حکومت کے رویے کی کڑی مذمت کی اور مطالبہ کیا کہ قومی لیڈران، مذہبی پیشواو رہنما وں کی تصاویر کو نصب کیا جائے۔
اخبارنویسوں سےگفتگو کرتےہوئے حزب مخالف لیڈر اور کرناٹک کے سابق وزیر اعلیٰ سدرامیا نے بتایا کہ کانگریس لیجسلیٹیو پارٹی کی طرف سے احتجاج نہیں بلکہ مطالبہ پیش کیاجارہاہے کہ قومی لیڈران اور مذہبی پیشوا و رہنماؤں کی تصاویر ودھان سبھا کے ہال میں آویزاں کی جائیں ۔ اس موقع پر سدرامیا نے ریاست کرناٹک کے کئی مذہبی رہنماؤں کا تذکرہ کرتےہوئے کہاکہ بشویشور ہیں، نارائن گرو ہیں، والمیکی، کنک داس، شیش نال شریف، کوئمپوجیسی کئی شخصیات ہیں اسی طرح مہاتما گاندھی ، ملک کے پہلے وزیر اعظم جواہر لال نہرو، نائب وزیر اعظم ولبھ بھائی پٹیل سمیت کئی قومی لیڈران ہیں جن کی تصاویر نصب کی جانی چاہئے۔ لیکن بی جےپی کی حکومت ایسا کچھ کرنےکےبجائے اپنےمن پسندلیڈران کی تصاویر بغیر کسی کو اطلاع دئیے لگارہے ہیں، جس کی کانگریس پارٹی سخت مخالفت کرتی ہے۔
سدرامیا نے کہا کہ ودھان سبھا کے ہال میں تصاویر سمیت جو بھی کام کیاجاتاہےوہ اسمبلی کی جائیداد ہوتی ہے۔ جب اسمبلی کی جائیداد ہوتی ہے تو لازمی ہے کہ وہ اسمبلی کو اعتماد میں لے کر کام کرے،اسمبلی کا مطلب برسر اقتدار پارٹی اور حزب مخالف پارٹی سمیت جو بھی اسمبلی میں ہےاس کو اعتماد میں لے، بزنس ایڈوائزری کمیٹی میں اس تعلق سےبحث کرے۔ ایسا کچھ بھی نہیں ہوا۔ اچانک تصاویر لگائی جارہی ہیں۔ انہوں نے حیرت کا اظہارکیا کہ آج میرےبیلگام پہنچنے پر اخبارنویسو ں کی طرف سے اس سلسلےمیں سوال کیاگیاتو مجھے تصاویر کے متعلق پتہ چلا۔
سدرامیا نے کہاکہ دراصل ہم اسمبلی کے اجلاس میں عوام کےسلگتےمسائل اٹھانے والے ہیں، کسانوں کے مسائل ، بڑھتی قیمتوں کا معاملہ، پینےکےپانی کا مسئلہ، رشوت خوری اور بدعنوانی سمیت کئی طرح کےی مسائل ہیں۔ جن پر بی جےپی حکومت کو جواب دینا ہے۔ چونکہ وہ مسائل کاجواب نہیں دےسکتے ، اسی لئے انہوں نےعوام کا رخ موڑنےکےلئے اس طرح کی حرکت کی ہے۔ لیکن ہم یہ مطالبہ عارضی طورپر کررہے ہیں۔ انہوں نے واضح کیا کہ ہم اسمبلی میں اصل مسائل پر بی جےپی کو گھیرنےکی کی کوشش کریں گے۔