جوئیڈا تعلقہ میں چرواہے پر ریچھوں کا حملہ
جوئیڈا:17؍ستمبر(ایس اؤ نیوز)تعلقہ کے کرنجے دیہات میں منگل کو جانور چرانے کے دوران چرواہے پر دو ریچھوں نے حملہ کرتے ہوئے شدید زخمی کرنے کا واقعہ پیش آیاہے۔
شدید زخمی ہونے والے کی شناخت بجارکونمگ گرام پنچایت حدود کے کرنجے شیواجی سوپولودیسائی (48) کی حیثیت سے کی گئی ہے۔ گاؤں سے آدھا کلو میٹر دور جانوروں کو چروانے کے دوران 2ریچھوں نے اچانک حملہ کرنے سے ہاتھ ،پیر اور سر زخمی ہوا ہے۔ ریچھوں اور شیواجی کی چیخ پکار سن کر لوگ دوڑ کر ان کی حفاظت کی۔ اس کے بعد ایمبولنس کے ذریعے زخمی شیواجی کو رام نگر اسپتال میں ابتدائی علاج کے بعد ڈاکٹروں کے صلاح کے مطابق بیلگام کے کے ایل ای اسپتال روانہ کیاگیا۔
تعلقہ میں گزشتہ ایک ہفتہ میں ریچھوں کی طرف سے یہ دوسراحملہ ہے۔ اس سلسلےمیں کمبارواڑ کے معاون فاریسٹ آفیسر شیوانند نے کہاکہ زخمی شیواجی کے اسپتال کے اخراجات محکمہ فاریسٹ سے ادا کئے جائیں گے۔
