بنگلورو،27؍مئی (ایس او نیوز) کانگریس کے رکن اسمبلی بی سی پاٹل نے کہا کہ ریاستی عوام کی خواہش ہے کہ سدارامیا وزیر اعلیٰ بنیں - یہاں اخباری نمائندوں سے بات کرتے ہوئے بی سی پاٹل نے اس خیال کا اظہار کیا اور کہا کہ سدارمیا ایک قابل اورایماندار سیاستدان ہیں اور انہیں وزیر اعلیٰ مقرر کرنے سے کانگریس بچ سکتی ہے- انہوں نے کہا کہ انہیں وزارت ملنے کی توقع تھی اور انہوں نے تین مرتبہ جیت حاصل کی ہے- انہوں نے الزام لگایا کہ کانگریس میں لنگایتوں کو نظر انداز کیا گیاہے- جے ایچ پٹیل، ایس آر بومئی، ویریندر پاٹل اور نجا لنگپا کو اقتدار سے محروم کیاگیا جس کے بعد متعلقہ پارٹیوں کا حال کیاہوا سب جانتے ہیں - انہوں نے کہا کہ موجودہ پارلیمانی انتخابات میں شمالی کرناٹک علاقہ میں لنگایتوں کو نظر انداز کئے جانے سے ہی کانگریس کو شکست کا سامنا کرنا پڑا ہے-بی جے پی رہنماؤں سے رابطہ کے تعلق سے بی سی پاٹل نے کہا کہ کسی بی جے پی رہنما نے ان سے رابطہ نہیں کیا اور نہ ہی رمیش جارکی ہولی سے ملاقات کی، تاہم اس سلسلہ میں آئندہ فیصلہ لیا جائے گا-