بنگلورو،18؍مارچ (ایس او نیوز) سلیکان سٹی میں پلاسٹک کے استعمال پر پابندی کے باوجود دکانوں ، مال، ہوٹل سمیت دیگر تجارتی مراکز میں باقاعدہ اس کا استعمال ہورہا ہے۔ اس سلسلہ میں کئی شکایتیں موصول ہونے پر آج بروہت بنگلور مہانگر پالیکے (بی بی ایم پی) افسروں نے اپنی حدود میں مال اور ہوٹلوں پر چھاپہ مار کر 15لاکھ روپیوں کا جرمانہ لگایا ہے۔ آج دوپہر بی بی ایم پی افسروں نے شہر کے اہم مالز جیسے اورئین مال، گروڈا مال، فورم مال، فنکس، آر ایم زیڈ گیلری میناکشی مال سمیت دیگر مالس پر بیک وقت چھاپے مارے۔ چھاپے کے دوران غیر معیاری پلاسٹک رکھنے کا پتا لگایا ۔ اس کے علاوہ افسروں نے ہوٹلوں پر بھی چھاپے مارے یہاں پر بھی غیر معیاری پلاسٹک کے استعمال پر مالکان پر ناراضگی جتائی اور غیر معیاری پلاسٹک کو ضبط کرلیا ہے۔ بی بی ایم پی شعبہ صحت و خاندانی بہبود کے افسر نے بتایا کہ اورئن مال میں 65 کلو غیر معیاری پلاسٹک جس کی مالیت 2لاکھ ہے ضبط کرلی ہے۔ اسی طرح گروڈا مال میں 1.25لاکھ کا 40 کلو پلاسٹک ۔ فورم مال میں 2.10لاکھ کا 25 کلو پلاسٹک، مہادیو پورہ کے فینکس میں 3.50 لاکھ کا 700 کلو پلاسٹک، یلہنکا کے آر ایم زیڈ گیلری میں 2.80 لاکھ کا 180 کلو پلاسٹک، بومنہلی کے میناکشی مال میں ڈیڑھ لاکھ روپیوں کا پلاسٹک ضبط کیا گیا ہے۔ افسروں نے آج کارروائی کرتے ہوئے جملہ 13.15 لاکھ روپئے مالیت کا 1010 کلو غیر معیاری پلاسکٹ ضبط کیا ہے۔ انہوں نے بتایا کہ 6مال کے علاوہ 4ہوٹلوں پر بھی چھاپہ مارئے گئے۔یہاں پر بھی غیر معیاری پلاسٹک کا استعمال کرنے پر مالکان اور ملازمین پر ناراضگی ظاہر کی گئی۔