بی بی ایم پی اسٹانڈنگ کمیٹیوں کے لئے انتخاب17جنوری کو
بنگلورو 9جنوری (ایس او نیوز) برہت بنگلور مہانگر پالیکے کی اسٹانڈنگ کمیٹیوں کے انتخاب کی تاریخ آخر کار طے ہوگئی۔ 17 جنوری کو ہونے والی کونسل میٹنگ میں اسٹانڈنگ کمیٹیوں کے چیرمینوں کا انتخاب عمل میں آئے گا۔ حالانکہ اس سے پہلے یہ انتخاب 5جنوری کو طے تھا لیکن بی جے پی کے ایک کارپوریٹر ناگراج کو بی بی ایم پی کی ایک اسٹانڈنگ کمیٹی کا چیرمین بنانے کانگریس کی کوشش پر بی جے پی کے سخت اعتراض کے سبب جو ہنگامہ کھڑا ہوا اس کی وجہ سے اسٹانڈنگ کمیٹی چیرمینوں کا انتخاب ملتوی کردیا گیا۔ اب 17 جنوری کو باضابطہ نئے چیرمینوں کا انتخاب عمل میں آئے گا۔12 اسٹانڈنگ کمیٹیوں میں سے سماجی انصاف کمیٹی اور وارڈ ورکس کمیٹی کے چیرمینوں کے انتخاب پر ابھی اتفاق نہیں ہوا ہے۔ کونسل اجلاس میں اراکین کے انتخاب کے بعد میئر کے کمرے میں چیرمینوں کا انتخاب کمیٹیوں کی میٹنگ کے ساتھ کردیا جائے گا۔ کانگریس اور جے ڈی ایس کارپوریٹروں نے باہمی طور پر بارہ کمیٹیوں کے اراکین اور دس کمیٹیوں کے چیرمینوں کا انتخاب کرلیا ہے۔ دو کمیٹیوں کے انتخاب پر اب بھی اتفاق اس لئے نہیں ہوا ہے کہ کانگریس اس بات کے لئے کوشاں ہے کہ جئے نگر اسمبلی حلقے میں آنے والے لکسندرا کے کارپوریٹر ناگراج کو سماجی انصاف کمیٹی کا چیرمین بنائیں۔ تاہم بی جے پی کی طرف سے اس کی شدید مخالفت کی جارہی ہے۔ ناگراج کو چیرمین بننے سے روکنے کے لئے 5جنوری کی میٹنگ میں بی جے پی نے اپنے سبھی کارپوریٹروں کو وہیپ جاری کیا تھا ، اس صورتحال کو دیکھتے ہوئے انتخاب کو ملتوی کردیاگیا۔ اس سلسلے میں صورتحال کو قابو میں کرنے کے لئے رکن اسمبلی رام لنگا ریڈی نے مداخلت کی اور چیرمین شپ کے لئے جاری رسہ کشی کو سلجھانے میں کامیابی حاصل کرلی ۔