بنگلورو،11؍اگست (ایس او نیوز) کورونا متاثرین کے مکانات کوسیل ڈاؤن کرنے کے طریقہ کارسے دست بردارہونے کے سلسلہ میں بروہت بنگلورمہانگرپالیکے (بی بی ایم پی) غورکررہاہے۔ شہرمیں متاثرین کی تعدادمیں ہرگزرتے دن کے ساتھ بے تحاشہ اضافہ ہورہاہے۔سیل ڈاؤن کرنے کی وجہ سے متاثرین کے مکان والے گھرسے باہرنکل نہیں پارہے ہیں۔ بی بی ایم پی کا خیال ہے کہ عوام میں اب بیداری آگئی ہے سب لوگ محسوس کررہے ہیں کہ یہ بیماری نہا یت متعدی ہے، اس لئے گھروں سے باہرنکلنا خطرہ سے خالی نہیں ہے۔اس لیے بی بی ایم پی نے یہ فیصلہ کیاہے کہ جب لوگ محتاط اورالرٹ ہوگئے ہیں تو متاثرین کے مکانات کوسیل ڈاؤن کرنے کی ضرورت کیاہے۔ سیل ڈاؤن کی بجائے کوئی اورمتبادل حل تلاش کرنے کے سلسلہ میں بھی بی بی ایم پی غورکررہاہے۔ بی بی ایم پی یہ محسوس کرلیاہے کہ متاثرہ کے مکانات سیل ڈاؤن کئے جانے سے گھروالوں کونہایت شرمندگی اور عار کاسامنا کرنا پڑتاہے۔ اس لیے بھی سیل ڈاؤن کرنے سے احترازکرنے پربی بی ایم پی آمادہ ہواہے۔ اس کے علاوہ سیل ڈاؤن کرنے کے لیے بھی ایک بڑی رقم خرچ کرنی پڑرہی ہے۔ ان رقوم کوبچانے کے مقصدسے بھی سیل ڈاؤن طریقہ ختم کرنے کامنصوبہ بنایاگیاہے۔ اس سلسلہ میں ردعمل ظاہرکرتے ہوئے بی بی ایم پی کمشنر منجوناتھ پرسادنے کہا کہ سیل ڈاؤن کئے جانے کے معاملہ میں کئی شکایات موصول ہوئی ہیں۔ لوگوں کی اکثریت کا کہناہے کہ متاثرین کے مکانات سیل ڈاؤن کرنے کا طریقہ کارمناسب نہیں ہے۔ مکانات کوسیل کرنا یا لوہے کے شیٹوں سے بندکرنا ہمارے لئے اچھانہیں لگتا،کئی بارہم کوبھی شرمندگی کاسامنا کرناپڑا ہے۔ عوام کی اس شکایت اوراپیل کوحکومت کے سامنے پیش کیاجائے گا۔ اس تجویزپرریاستی حکومت کیا فیصلہ کرے گی،اس کاانتظارکرنا ہوگا۔ تاہم اب تک سیل ڈاؤن نہ کرنے کے سلسلہ میں کوئی فیصلہ نہیں کیاگیاہے۔