کووِڈ حالات کے باوجود ریاست کی اقتصادی حالت مستحکم: بسوا راج بومئی
بنگلورو،17؍نومبر (ایس او نیوز) ریاستی وزیر اعلیٰ بسوا راج بومئی نے کہاکہ ملک کی اقتصادی صورتحال میں ترقی کے معاملے میں ریاست کا رول بے حد اہم ہے اور کووِڈ کے حالات کے باوجود ریاست کی اقتصادی حالت مستحکم ہے۔ مختلف ریاستوں کے وزرائے اعلیٰ کے ساتھ مرکزی وزیر برائے مالیات نرملا سیتا رمن کی ویڈیو کانفرنس میں حصہ لیتے ہوئے بومئی نے اس خیال کا اظہارکیا۔ انہوں نے مرکز سے مطالبہ کیا کہ ضلع کانکنی فنڈ کے ایک حصہ کو ریاست منتقل کرنے کا موقع فراہم کیا جائے جس سے معدنیات لے جانے سے دیگر اضلاع کی بنیادی سہولتوں کو ہونے والے نقصانات کی بھرپائی کی جاسکے گی۔ انہوں نے کہاکہ مختلف اسکیموں کے لئے محکمہ ماحولیات وجنگلات کی منظوری کے تعلق سے واضح پالیسی کی ضرورت ہے۔ اس کے علاوہ سرمایہ کاری میں دلچسپی دکھانے والی کمپنیوں کے تعلق سے شفافیت کے ساتھ جانکاری فراہم کی جائے۔ بومئی نے کہاکہ کلیان کرناٹک علاقہ میں سرمایہ کاری کو فروغ دینے مختلف ٹاؤن شپ کی ترقی، مقامی اداروں اور دیہی مقامی انتظامیہ کے قوانین میں ترمیم کو فروغ دینے کی ضرورت ہے۔