وزیر اعلیٰ بسواراج بومئی نے ایندھن کی قیمتوں میں اضافہ کا الزام کانگریس پر ڈالا، قیمتیں کم کرنے کے سلسلہ میں مرکزی وزیر خزانہ سے بات چیت جلد
بنگلورو،3؍ستمبر(ایس او نیوز) وزیر اعلیٰ بسواراج بومئی نے اشیاء ضروریہ کی قیمتوں میں بے تحاشہ اضافہ اور اس پر عوام کی ناراضگی کے درمیا ن کہا ہے کہ ایندھن کی قیمتوں میں بے تحاشہ اضافہ کے سلسلہ میں وہ مرکزی وزیر خزانہ نرملا سیتا رمن سے بات کریں گے۔
ہبلی میں اخباری نمائندوں سے بات کرتے ہوئے وزیر اعلیٰ نے اس سوال پر کہ پٹرول، ڈیزل اور ایل پی جی کی قیمتوں میں اضافہ سے عام آدمی پریشان ہے،اسے کم کرنے کے لئے حکومت کیا کرے گی؟انہوں نے جواب دیا کہ اس سلسلہ میں وہ وزیر خزانہ سے بات کریں گے۔ انہوں نے ایندھن کی قیمتوں میں بے تحاشہ اضافہ کا دفاع کرتے ہوئے کہا کہ بین الاقوامی بازاروں میں خام تیل کی قیمتوں میں اضافہ ایندھن کی قیمت میں اضافہ کا سبب لگتا ہے۔ وہ جانتے ہیں کہ اس سے عوام پر بوجھ بڑھا ہے۔ اس سلسلہ میں وہ جلد ہی مرکزی وزیر خزانہ سے بات کریں گے۔
وزیر اعلیٰ نے اس بات کا اعتراف کیا کہ قیمتوں میں بے تحاشہ اضافہ کی وجہ سے عام آدمی سخت ناخوش ہے۔ انہوں نے کانگریس کے اس الزام پر کہ خام تیل کی قیمتوں میں کمی کے باوجود ریٹیل میں ملنے والے ایندھن کی قیمت میں اضافہ ہوا ہے، مسٹر بومئی نے کہا کہ تیل کی کمپنیوں کو قیمتوں پر نظر ثانی کرنے کا اختیار یوپی اے حکومت کی طرف سے دیا گیا اور کانگریس کے دور اقتدار میں ہی ان کمپنیوں نے آئیل بانڈس جاری کئے تھے۔ انہوں نے کہا کہ ایندھن کی قیمتوں میں اضافہ کا سلسلہ کانگریس کے دور اقتدار میں شروع ہوا تھا۔ بومئی نے کہا کہ 5ستمبر کو نرملا سیتا رمن کرناٹک کے دورہ پر آ رہی ہیں، اس مرحلہ میں وہ ان سے ایندھن کی قیمتوں کے سلسلہ میں بات کریں گے۔