بنٹوال میں رات کے وقت گھر میں گھس کرچوروں نے اڑالیے نقدی اور زیورات
بنٹوال،21/اکتوبر (ایس او نیوز) بنٹوال کے ایرا گاؤں میں ابراہیم ریاض نامی شخص کے گھر میں گھس کر چوروں کے ذریعے نقدی اور زیورات اڑالینے کی واردات پیش آئی ہے۔
موصولہ تفصیلات کے مطابق جمعہ کے دن آدھی رات کے وقت چوروں نے ابراہیم کے گھر کے پچھلے حصے میں واقع کھڑکی سے ہاتھ ڈال کر پچھلے دروازے کی کنڈی کھولی اور گھر میں داخل ہونے کے بعد تقریباً پچاس ہزار روپے مالیت کے زیورات اور نقد دو سو روپوں پر ہاتھ صاف کردیا۔اس کے علاوہ ابراہیم ریاض کے پڑوس میں واقع اسماعیل کے گھر میں بھی چوروں نے داخل ہونے کی کوشش کی تھی، مگر وہ لوگ اس میں کامیاب نہیں ہوئے۔
چوری کی واردات کی اطلاع ملنے پر پولیس نے فنگر پرنٹس ماہرین اور ڈاگ اسکواڈ کے ساتھ جائے واردات پر پہنچ کر تحقیقات شروع کردی۔بنٹوال مضافاتی پولیس اسٹیشن کے پی ایس آئی پرسنّا نے بھی جائے وقوع پر پہنچ کر معائنہ کیا۔اور ابراہیم ریاض کی طرف سے تحریری شکایت درج کرلی گئی۔