بنٹوال ،17 ؍ جنوری (ایس او نیوز) کلاڈکا کے نرہاری ہِل علاقے میں بی جے پی کی تشہیری گاڑی ایک موٹر بائک سے ٹکرا گئی جس کے نتیجہ میں بائک سوار ہلاک ہوگیا۔
    
مہلوک کی شناخت وجیت (35 سال) کے طور پر کی گئی ہے جو بیلتنگڈی کا رہنے والا تھا ۔ معلوم ہوا ہے کہ بی جے پی کی یہ تشہیری گاڑی تلنگانہ آئی تھی جو بی جے پی ایم ایل اے راجیش نائک کی جانب سے منعقدہ پیدل مارچ کا حصہ تھی ۔ یہ آئیسوزو گاڑی تلنگانہ کا رہنے والا شخص چلا رہا تھا۔ 
    
حادثہ کے وقت تشہیری گاڑی میلکار سے کلاڈکا کی طرف بڑھ رہی تھی اور سامنے سے آنے والی موٹر بائک سے ٹکرا گئی ۔ تصادم کے نتیجے میں بائک سوار وجیت شدید زخمی ہوگیا اور اسے تومبے اسپتال میں منتقل کیا گیا مگر اس نے زخموں کی تاب نہ لاتے ہوئے دم توڑ دیا۔ 
    
بائک کی سوار کی موت کے پس منظر میں ایم ایل اے نے اپنا پیدل مارچ منسوخ کردیا اور ہاسپٹل پہنچ کر مہلوک کے رشتہ داروں سے تعزیت کی۔