مینگلور کے قریب بنٹوال میں دیپ جلاؤ مہم کے دوران اقلیتوں کے گھروں پر پتھراؤ۔ پولیس میں درج کی گئی شکایت
مینگلور 7/اپریل (ایس او نیوز) کورونا وائرس کے خلاف متحدہ طور پر جدوجہد کی علامت کے طور پر وزیر اعظم نریندرا مودی نے دیپ جلانے کی جو آواز دی تھی، اس کے دوران مینگلور کے قریبی علاقے بنٹوال میں اقلیتوں کے گھروں پر پتھراؤ کرنے اور پٹاخے پھینکنے کی واردات پیش آئی ہے۔
موصولہ اطلاع کے مطابق کے مبینہ طور پر یہ واقعہ بنٹوال تعلقہ کے پرتاپ نگر میں پیش آیا تھا۔ وہاں کے رہنے والے حنیف نامی ایک شخص کا کہنا ہے کہ دیپ جلانے کے مقررہ وقت کے گزرتے ہی کچھ شرپسندوں نے یہاں پر رہنے والے اقلیتی طبقے کے گھروں پر پٹاخے پھینکے۔ پھر رات کے 11بجے کے قریب اقلیتوں کے کئی گھروں پر پتھراؤ کیا گیا۔ فوری طور پر اس بات کی اطلاع پولیس کو دی گئی تو مضافاتی پولیس اسٹیشن کے افسران اور عملے نے جائے واردات پر پہنچ کر آس پاس کے علاقے کا معائنہ کیااور صبح میں پولیس اسٹیشن پہنچ کرشکایت درج کے لئے کہا۔اس ہدایت کے مطابق حنیف نے 6اپریل کی صبح میں پولیس اسٹیشن جاکر باضابط شکایت درج کروائی ہے۔