منگلور کے قریب بنٹوال میں کنواں چوری ہونے کا عجیب معاملہ - پی ڈی او نے درج کروائی شکایت
مینگلور ،28 ؍ مئی (ایس او نیوز) قریبی تعلقہ بنٹوال سے گمشدگی اور چوری کا ایک غیر معمولی معاملہ سامنے آیا ہے جس میں بنٹوال تعلقہ کے ناریکومبو گرام پنچایت کے ڈیولپمنٹ آفیسر نے پولس تھانہ میں ایک کنواں اپنی جگہ سے غائب ہوجانے کی رپورٹ درج کروائی ہے۔
پی ڈی او شیوا گونڈپّا برادر نے اپنی شکایت میں کہا ہے کہ مہاتما گاندھی نیشنل رورل ایمپلائمنٹ گارنٹی پروجیکٹ (منریگا) کے تحت 13-2012 میں ناریکومبو گرام پنچایت حدود میں عوامی استعمال کے لئے 73,305 روپے کی لاگت سے ایک کنواں تعمیر کیا تھا ۔ اب وہ کنواں اپنی جگہ سے غائب ہوگیا ہے ۔
شکایت میں مزید کہا گیا ہے کہ دیانند پجاری نامی گاوں کے ایک شخص نے اس کنویں کو پوری طرح مٹایا ہے اور زمین کو غیر قانونی طور پر اپنے قبضے میں کر لیا ہے جس سے سرکاری املاک کا نقصان ہوا ہے ۔ اس لئے دیانند پجاری کے خلاف قانونی کارروائی کی جائے ۔