بنٹوال، 30/اگست (ایس او نیوز) شہر کے مضافات امونجے نامی علاقے میں ایک پرانی عمارت کی مرمت کے دوران دیوار ڈھلنے سے ایک شخص ہلاک ہوگیا جبکہ دو نوجوانوں کو زخمی حالت میں علاج کے لئے اسپتال میں داخل کیا گیا ہے۔
اطلاع کے مطابق ایک مذہبی مرکز کی قدیم عمارت کی مرمت اور توسیع کا کام چل رہا تھا۔ اس دوران اچانک عمارت کی دیوار ڈھل گئی اور ایک بہت بڑا پتھرجناردھن انچن (35) نامی شخص کے اوپر گرگیا۔ جناردھن کو گہری چوٹیں آگئیں جس کے بعد اسے فوری طور پر اسپتال میں منتقل کرنے کی کوشش کی گئی مگر اس نے زخموں کی تاب نہ لاتے ہوئے راستے میں ہی دم توڑ دیا۔ اس کے علاوہ گرتی ہوئی دیوار کی زد میں ریشبھ (11) اور سورج (20) بھی آگئے جس سے ان کے جسم پر معمولی زخم آئے ہیں اور انہیں علاج کے لئے اسپتال میں داخل کیا گیا ہے۔
حادثے کی اطلاع ملنے پر بنٹوال دیہی پولیس اسٹیشن کے سب انسپکٹر سنجیو اور دیگر پولیس افسران نے موقع پر پہنچ کر معائنہ کیا اور کیس درج کرلیا۔